అలా చేస్తే.. ఫెయిలైనట్లే

‘‘ప్రతి సినిమాలోనూ వినోదం ఉండటాన్ని నేను ఇష్టపడతాను. ఒక విషయం చెప్పాలిఅనుకున్నప్పుడు నవ్వించి చెప్తే తప్పేముంది అనిపిస్తుంది. అలా నవ్వించి చెప్పినప్పుడు ఆ విషయాన్ని ప్రేక్షకులు మరింత ఎక్కువ కాలం గుర్తుంచుకుంటారు’’ అన్నారు అవసరాల శ్రీనివాస్‌. ఇప్పుడాయన హీరోగా నటించిన చిత్రం ‘నూటొక్క జిల్లాల అందగాడు’. రాచకొండ విద్యాసాగర్‌ దర్శకుడు. ఈ సినిమా శుక్రవారం విడుదలవుతోంది. ఈ సందర్భంగా గురువారం శ్రీనివాస్‌ హైదరాబాద్‌లో విలేకర్లతో మాట్లాడుతూ ‘‘మన సమాజంలో బాడీ షేమింగ్‌ అన్నది ఎప్పటి నుంచో ఉంది. అది ఎంతోమంది ఆత్మవిశ్వాసాన్ని దెబ్బతీస్తోంది. అందుకే ఇలాంటి అంశంపై ఓ కథ చెప్పాలి అన్న ఉద్దేశంతో ఈ సినిమా చేశాం. ఈ చిత్రంలో నేను బట్టతల సమస్యతో ఇబ్బంది పడే గొత్తి సూర్యనారాయణ అనే పాత్రలో కనిపిస్తా. నేను ఈ కథ రాసుకున్నప్పుడు తొలుత ‘అందమే ఆనందం’ అనే టైటిల్‌ అనుకున్నా. కానీ ‘నూటొక్క జిల్లాల అందగాడు’ అన్న పేరే క్రిష్‌కి బాగా నచ్చింది. దీంతో ఆ పేరే ఖరారు చేశాం. ఈ చిత్రంలో ఎవరినీ కించపరచలేదు. ఈ సినిమా చూశాక ఎవరైనా పక్కవారిని ఇంకా కామెడీ చేస్తే.. సినిమా సక్సెస్‌ అయినా.. ఫెయిల్యూర్‌ అన్నట్టే’’ అని చెప్పారు.