Bigg boss 7 telugu: బిగ్‌బాస్‌ సీజన్‌-7 ‘2.ఓ’ షురూ.. వైల్డ్ కార్డ్‌తో హౌస్‌లోకి వెళ్లింది వీళ్లే!

హైదరాబాద్‌: గత సీజన్‌లకు భిన్నంగా ‘బిగ్‌బాస్‌ సీజన్‌-7’ (Bigg Boss Telugu7) సాగుతోంది. ‘ఉల్టా పుల్టా’ అంటూ దాదాపు ఐదు వారాల కిందట మొదలైన ఈ సీజన్‌లో మరో సరికొత్త అధ్యాయం ప్రారంభమైంది. ఈ ఐదు వారాల్లో ఐదుగురు మహిళా కంటెస్టెంట్‌లను బయటకు పంపిన బిగ్‌బాస్‌ ఈ ఆదివారం శుభశ్రీ, గౌతమ్‌ కృష్ణల డబుల్‌ ఎలిమినేషన్‌తో షాకిచ్చాడు. ఆ కాసేపటికే గౌతమ్‌ కృష్ణను సీక్రెట్‌ రూమ్‌ను పంపి, మరో ట్విస్ట్‌ ఇచ్చాడు. అంతేకాదు, సీజన్‌-7 ‘2.ఓ’ షురూ చేశాడు. ఒకరు కాదు, ఇద్దరు కాదు, ఏకంగా ఐదుగురు కంటెస్టెంట్‌లను వైల్డ్‌ కార్డ్‌ ఎంట్రీ (wild card entry contestants) ద్వారా హౌస్‌లోకి పంపాడు.

షాకింగ్‌.. ఈసారి డబుల్‌ ఎలిమినేషన్‌.. శుభశ్రీ, గౌతమ్‌ ఔట్‌.. కానీ!

అంబటి అర్జున్‌ (Ambati Arjun), అశ్వినీ శ్రీ (Ashwini Sri), భోలే షావలి (Bhole Savali), పూజా మూర్తి (Pooja Murthy), నయని పావని (Nayani Pavani)లు హౌస్‌లోకి అడుగు పెట్టారు. ఈ వీకెండ్‌ ఎపిసోడ్‌కి ‘చిన్నా’ ప్రమోషన్స్‌లో భాగంగా సిద్ధార్థ్‌ వచ్చి హౌస్‌మేట్స్‌తో పాటలు పాడి, డ్యాన్స్‌ చేయించారు. ఇక ‘టైగర్‌ నాగేశ్వరరావు’ ప్రమోషన్స్‌లో భాగంగా ఆ సినిమా హీరోయిన్స్‌తో కలిసి రవితేజ వచ్చి బిగ్‌బాస్‌ వేదికపై సందడి చేశారు.

అంబటి అర్జున్

ప్రస్తుతం బిగ్‌బాస్‌-7లో సీరియల్‌ నటులు చాలా మందే ఉన్నారు. ఇప్పుడు ఈ జాబితాలో అంబటి అర్జున్‌ (Ambati Arjun)  చేరారు. సీరియల్ ఆర్టిస్ట్‌గా, డ్యాన్సర్‌గా, యాంకర్‌గా.. ఇలా తను మల్టీ టాలెంటెడ్‌. అర్జున్‌ అసలు పేరు అంబటి నాగార్జున. ఐదు వారాలు బిగ్‌బాస్‌ చూడటం తనకు కాస్త అడ్వాంటేజ్‌ అని అర్జున్‌ అన్నాడు. ‘ఎవరు ఎలాంటి వారో తెలుసుకుని ఉండటం వల్ల వాళ్లతో ఎలా నడుచుకోవాలో అర్థమైంది. మరోవైపు ఇప్పటికే హౌస్‌లో  ఉన్న వాళ్లకు ఒక ఫ్యాన్‌ బేస్‌ ఏర్పడి ఉంటుంది. వాళ్లకే మద్దతు ఎక్కువగా ఉంటుంది. అదే సమయంలో ‘ఇప్పటివరకూ నువ్వు ఆట చూసి ఇక్కడకు వచ్చావు’ అని హౌస్‌లోని వాళ్లు అంటారు. వాటిని భరించాలి. బిగ్‌బాస్‌ హౌస్‌లో దమ్ముగా ఆడుతున్న వ్యక్తులు యావర్‌, ప్రశాంత్‌ కాగా, దమ్ముగా ఆడని వారు అమర్‌, సందీప్‌. అమర్‌ ఆడకుండా ఉంటాడని మేము అస్సలు అనుకోలేదు. చెప్పే పాయింట్‌ కూడా సరిగా ఉండటం లేదు. సందీప్‌ ప్రతి చిన్నదానికి గొడవకు వెళ్తున్నారు’’ అని అర్జున్‌ చెప్పి, హౌస్‌లోకి వెళ్లాడు.

అశ్విని శ్రీ

‘బిగ్ బాస్ సీజన్ 7’లో అలరించేందుకు సిద్ధమైంది మరో ఇన్‌స్టాగ్రామ్ ఇన్‌ఫ్లుయెన్సర్ అశ్విని శ్రీ (Ashwini Sri). వైల్డ్‌కార్డ్‌ ద్వారా ఎంట్రీ దక్కించుకున్న ఈ అశ్విని.. రతిక వెళ్లిపోయిన లోటును భర్తీ చేస్తుందని ఆశిస్తున్నారు. ఈ సందర్భంగా అశ్వినీ మాట్లాడుతూ..  తల్లిదండ్రుల కోరిక మేరకు చదువు పూర్తి చేసిన తర్వాతే సినిమాల్లోకి వచ్చానని చెప్పుకొచ్చింది. ‘నాకు కోపం ఎంత ఉందో.. ప్రేమ కూడా అంతే ఉంది. హౌస్‌లో ఉన్నవాళ్లలో బాగా ఆడుతున్న వ్యక్తులు శివాజీ, పల్లవి ప్రశాంత్‌లు కాగా, ప్రియాంక, శోభాశెట్టి ఆశించిన స్థాయిలో ఆడటం లేదు. చిన్నప్పటి నుంచి ఏదైనా అనుకుంటే సాధించి తీరుతాను. నేను కిక్‌ బాక్సింగ్‌ కూడా నేర్చుకున్నా’’ అంటూ అశ్విని శ్రీ చెప్పి, హౌస్‌లో అడుగు పెట్టింది.

భోలే షావలి

ప్రైవేట్ ఆల్బమ్ సాంగ్స్‌తో నెటిజన్లకు బాగా చేరువైన వారిలో భోలే షావలి (Bhole Savali) ఒకరు. తెలంగాణ పాటలతో ఫేమస్ అయిపోయి యూట్యూబ్‌లో లక్షల మంది ఫాలోవర్స్‌ను సంపాదించుకున్నాడు. బిగ్ బాస్ సీజన్ 7లో భోలే షావలి వైల్డ్‌ కార్డు ఎంట్రీ ద్వారా అడుగు పెట్టాడు. అమ్మ పాట తనకు పాఠమై బువ్వ పెడితే , బిగ్‌బాస్‌ పిలుపు తనకు ఊపునిచ్చిందని చెప్పాడు. ‘భోలే షావలి అంటే, వరంగల్‌ జిల్లాలో దర్గా ఉంది. చిన్నప్పుడు మా అమ్మానాన్న అక్కడ మొక్కుకున్నారు. ఆ పేరు నాకు పెట్టారు. పాట ఉన్నా లేకపోయినా ఊపులోనే ఉంటా. రైతు బిడ్డకు పోటీగా నేను పాట బిడ్డ అని పెట్టుకోలేదు’ అని భోలే షావలి చెప్పాడు. అనంతరం నాగార్జునపై పాట పాడాడు.   శివాజీ, ప్రశాంత్‌ హౌస్‌లో బాగా ఆడుతుండగా, అమర్‌దీప్‌ సరిగా ఆడటం లేదనిపిస్తోందని భోలే షావలి అన్నాడు. 

పూజా మూర్తి

బిగ్‌బాస్‌-7లో అడుగు పెడుతున్న మరో సీరియల్‌ నటి పూజా మూర్తి (Pooja Murthy). ‘గుండమ్మ కథ’ అనే సీరియల్ ద్వారా తెలుగు ప్రేక్షకులకు ఆమె సుపరిచితురాలు. అసలు ఈ సీజన్‌ ఆరంభంలోనే ఆమె హౌస్‌లో అడుగు పెట్టాల్సి ఉంది. షో ప్రారంభమయ్యే రెండు రోజుల ముందు ఆమె తండ్రి చనిపోవడంతో విరామం తీసుకుంది. ‘నాన్న చనిపోయారన్న బాధ నుంచి ఇంకా పూర్తిగా కోలుకోలేదు. బిగ్‌బాస్‌కు వెళ్తున్నానని చెప్పినప్పుడు ఆయన చాలా సంతోషించారు. నన్ను ఈ వేదికపై చూడాలనుకున్నారు. అందరితో సరదాగా ఉంటాను. ఆటపట్టిస్తాను. హౌస్‌లో కూడా అలాగే ఉంటాను. ఇక ఇప్పటివరకూ హౌస్‌లో ఉన్న వాళ్లలో దమ్మున్న ఆటగాళ్లు శివాజీ, సందీప్‌ మాస్టర్‌. ఇక దుమ్ముగా ఆడేవాళ్లలో తేజ ఒకరు. 

నయని పావని కూడా..

బిగ్‌బాస్‌లో అడుగుపెట్టిన మరో సోషల్ మీడియా ఇన్‌ఫ్లూయెన్సర్‌, టిక్ టాక్ స్టార్‌ నయని పావని (Nayani Pavani). టిక్ టాక్ వీడియోల్లో తనదైన హావభావాలతో అదరగొట్టేది. తెలంగాణ అమ్మాయి అయిన నయని, టిక్ టాక్‌తో వచ్చిన క్రేజ్‌తో ఇన్‌స్టాగ్రామ్‌లో అడుగుపెట్టింది. హౌస్‌లో దమ్ముతో ఆడుతున్న వాళ్లలో ప్రిన్స్‌ యావర్‌, ప్రశాంత్‌లు ఉండగా, అమర్‌, తేజలు సరిగా ఆడటం లేదని చెప్పింది. ఈ సందర్భంగా తేజ, యావర్‌, ప్రశాంత్‌ల ఫొటోలను చూపించి, ఎవరితో స్నేహం, డేట్‌, పెళ్లి చేసుకుంటావ్‌ అని అడగ్గా, తేజతో ఫ్రెండ్‌షిప్‌ చేస్తానని, యావర్‌తో డేట్‌కు వెళ్తానని, ప్రశాంత్‌ను పెళ్లి చేసుకుంటానని సరదాగా చెప్పింది.