Parinayam: దుల్కర్‌, కల్యాణిల ఫీల్‌గుడ్ మలయాళ మూవీ ‘ఆహా’లో!

హైదరాబాద్‌: దుల్కర్‌ సల్మాన్‌, కల్యాణి ప్రియదర్శన్‌ జంటగా నటించిన రొమాంటిక్‌ కామెడీ డ్రామా ‘వరునె అవశ్యముంద్‌’. అనూప్‌ సత్యన్‌ దర్శకుడు. గతేడాది ఫిబ్రవరిలో మలయాళంలో విడుదలైన ఈ సినిమా బాక్సాఫీస్‌ వద్ద మంచి టాక్‌ తెచ్చుకుంది. సురేశ్‌గోపి, శోభన కీలక పాత్రల్లో నటించి మెప్పించారు. దాదాపు ఐదేళ్ల తర్వాత సురేశ్‌ గోపి నటించడం, పైగా శోభనతో ఆయన 15ఏళ్ల తర్వాత కలిసి తెరను పంచుకోవడంతో ఈ సినిమాపై మంచి అంచనాలు ఏర్పడ్డాయి. కాగా, ఇప్పుడు ఈ చిత్రం తెలుగు ప్రేక్షకులను పలకరించబోతోంది. పలు భాషల్లో విజయవంతమైన చిత్రాలను తెలుగు ప్రేక్షకులకు అందిస్తున్న ప్రముఖ ఓటీటీ ‘ఆహా’ ‘వరునె అవశ్యముంద్‌’ను ‘పరిణయం’ పేరుతో తీసుకువస్తోంది. సెప్టెంబరు 24నుంచి ఈ సినిమా ‘ఆహా’లో స్ట్రీమింగ్‌ కానుంది. దుల్కర్‌ సల్మాన్‌ నిర్మాతగా వ్యవహరించిన ఈ సినిమాకు అల్ఫాన్స్‌ జోసెఫ్‌ స్వరాలు సమకూర్చారు.