Kamal Haasan: పాటల హంగామా..

ఈ వేసవిలో అగ్ర తారల సినిమాల జోరు కనిపించలేదు. మే నుంచైనా హడావుడి మొదలవుతుందేమో అనుకుంటే, ఇంకాస్త ఆలస్యం అనే సంకేతాలు వస్తున్నాయి. ‘పుష్ప2’ మినహా మరే సినిమా విడుదల తేదీని ఖరారు చేయలేదు. విడుదల తేదీపై స్పష్టత రాకపోయినా... ఆయా సినిమాలు మే నెలని ప్రచారం కోసం ఉపయోగించుకునేందుకు ప్రణాళికలు రచించాయి. వచ్చే నెలంతా కొత్త సినిమాల పాటల హంగామా కొనసాగనుంది. ఇప్పటికే ‘పుష్ప2’ తొలి పాట విడుదల ఖరారైంది. మే 1న ఆ పాట విడుదలవుతోంది. త్వరలోనే ‘భారతీయుడు2’ తొలి పాటని కూడా విడుదల చేయనున్నారు. ‘దేవర’, ‘డబుల్‌ ఇస్మార్ట్‌’ తదితర సినిమాలూ పాటల హంగామాని షురూ చేయనున్నట్టు సమాచారం. ఆసక్తికరమైన కలయికల్లో రూపొందుతున్న సినిమాలు కావడంతో, ఆయా పాటలపైన కూడా భారీ అంచనాలు ఉన్నాయి. ‘భారతీయుడు 2’ విడుదల జూన్‌లో అని ఇదివరకు చిత్రబృందం ప్రకటించినా, తేదీ ఎప్పుడనేది స్పష్టత లేదు. అయితే ఆ సినిమా విడుదల లోపు, తొలి ‘భారతీయుడు’ రీరిలీజ్‌గా ప్రేక్షకుల ముందుకు రానున్నట్టు సమాచారం. ఇప్పుడంతా రీ రిలీజ్‌ల ట్రెండ్‌ కొనసాగుతుండడం, త్వరలోనే ‘భారతీయుడు 2’ విడుదల ఉండటంతో ఇదే సరైన సమయమని భావించిన చిత్రబృందం తొలి సినిమాని విడుదల చేయాలనే ఆలోచనలో ఉన్నట్టు సమాచారం.