Sree Vishnu: హిట్టు జోడీ.. ఈసారి ఇన్వెస్టిగేటివ్‌ థ్రిల్లర్‌తో!

‘సామజవరగమన’ చిత్రంతో సినీప్రియుల్ని కడుపుబ్బా నవ్వించింది శ్రీవిష్ణు - రెబా మోనిక జాన్‌ల జోడీ. ఇప్పుడీ జంట మరోసారి ప్రేక్షకుల్ని అలరించేందుకు సిద్ధమవుతోంది. వీళ్లిద్దరూ కలిసి నటిస్తున్న ఈ సినిమాని హుస్సేన్‌ షా కిరణ్‌ తెరకెక్కిస్తున్నారు. సందీప్‌ గుణ్ణం, వినయ్‌ చిలకపాటి నిర్మిస్తున్నారు. ఈ సినిమాని బుధవారం అధికారికంగా ప్రకటించారు. ‘‘ఇదొక ఆసక్తికర కథాంశంతో రూపొందుతోన్న ఇన్వెస్టిగేటివ్‌ థ్రిల్లర్‌. ఇప్పటికే 60శాతం చిత్రీకరణ పూర్తి చేసుకుంది’’ అని చిత్ర వర్గాలు తెలిపాయి. ఈ చిత్రంలో అయ్యప్ప శర్మ, వీర్‌ ఆర్యన్‌, సుదర్శన్‌ తదితరులు కీలక పాత్రలు పోషిస్తున్నారు. కాలభైరవ సంగీతమందిస్తున్నారు. విద్యాసాగర్‌ ఛాయాగ్రాహకుడిగా వ్యవహరిస్తున్నారు. త్వరలో మరిన్ని వివరాల్ని వెల్లడించనున్నారు.