Kiara Advani: ‘గేమ్‌ ఛేంజర్‌’.. మీ ఊహకు మించి: కియారా అడ్వాణీ

ఇంటర్నెట్‌ డెస్క్‌: ‘వినయ విధేయ రామ’ (Vinaya Vidheya Rama) తర్వాత హీరో రామ్‌చరణ్‌ (Ram Charan), హీరోయిన్‌ కియారా అడ్వాణీ (Kiara Advani) కలిసి నటిస్తున్న చిత్రం ‘గేమ్‌ ఛేంజర్‌’ (Game Changer). కోలీవుడ్‌ ప్రముఖ దర్శకుడు శంకర్‌ (Shankar) ఈ చిత్రాన్ని తెరకెక్కిస్తున్నారు. ఇటీవల ఓ ఇంటర్వ్యూలో పాల్గొన్న కియారా ఈ సినిమా అప్‌డేట్‌ ఇచ్చారు. రామ్‌చరణ్‌ అభిమానులు, ప్రేక్షకుల ఊహకు మించి ఈ సినిమా ఉంటుందంటూ ఆసక్తి రేకెత్తించారు. ‘‘సుమారు రెండేళ్ల నుంచి గేమ్‌ ఛేంజర్‌ సినిమా షూటింగ్‌ జరుగుతోంది. ఈ ఏడాది చివరికి పూర్తవుతుందనుకుంటున్నా. అవుట్‌పుట్‌ అద్భుతంగా వస్తోంది. ఈ చిత్రం కోసం మేమంతా ఎంతో కష్టపడుతున్నాం’’ అని పేర్కొన్నారు. రామ్‌చరణ్‌ తనకు మంచి స్నేహితుడని, దర్శకుడు శంకర్‌ నుంచి ఎన్నో కొత్త విషయాలు నేర్చుకున్నానని తెలిపారు. పాన్‌ ఇండియా స్థాయిలో ముందుగా ఈ చిత్రాన్ని క్రిస్మస్‌ కానుకగా విడుదల చేయాలని దర్శక, నిర్మాతలు భావించారు. కియారా ఇచ్చిన అప్‌డేట్‌తో ఈ సినిమా డిసెంబరులో విడుదలయ్యే అవకాశాలు లేనట్టే అనిపిస్తోంది. 

ఆ విషయం నన్నెంతో భయపెడుతుంది: సాయి ధరమ్‌ తేజ్‌

ప్రముఖ నిర్మాత దిల్‌రాజు (Dil Raju) నిర్మిస్తున్న 50వ చిత్రమిది. బడ్జెట్‌ విషయంలో ఎక్కడా రాజీ పడకుండా రూపొందిస్తున్నారు. పొలిటికల్‌ యాక్షన్‌ ఎంటర్‌టైనర్‌గా తెరకెక్కుతోన్న ఈ మూవీలో రామ్‌చరణ్‌ ద్విపాత్రాభినయం చేస్తున్నారని సమాచారం. శ్రీకాంత్‌, అంజలి, ఎస్‌.జె. సూర్య, సునీల్‌ తదితరులు కీలక పాత్రల్లో నటిస్తున్నారు. మరోవైపు, కమల్‌హాసన్‌ హీరోగా శంకర్‌ ‘ఇండియన్‌ 2’ (భారతీయుడు 2) సినిమా తెరకెక్కిస్తున్న సంగతి తెలిసిందే. ఈ ఇద్దరి కాంబినేషన్‌లో 1996లో వచ్చిన ‘ఇండియన్‌’కు సీక్వెల్‌ ఇది. షూటింగ్‌ చేస్తూనే, మరోవైపు పోస్ట్‌ ప్రొడక్షన్స్‌ పనులు చేస్తున్నారు. అడ్వాన్స్‌డ్‌ టెక్నాలజీతో దివంగత నటులు వివేక్‌, నెడముడి వేణు పాత్రలను రీక్రియేట్‌ చేయబోతున్నారు. ఈ సినిమా విడుదల తేదీపైనా స్పష్టత లేదు.