Cinema News: ‘కడువా’.. వారం ఆలస్యంగా

పృథ్వీరాజ్‌ సుకుమారన్‌ (Prithviraj Sukumaran) హీరోగా షాజీ కైలాస్‌ తెరకెక్కించిన పాన్‌ ఇండియా చిత్రం ‘కడువా’ (Kaduva). సుప్రియా మేనన్‌, లిస్టిన్‌ స్టీఫెన్‌ సంయుక్తంగా నిర్మించారు. సంయుక్త మేనన్‌ కథానాయిక. వివేక్‌ ఒబెరాయ్‌ కీలక పాత్రలో నటించారు. ఈ సినిమాను జూన్‌ 30న విడుదల చేయనున్నట్లు గతంలో ప్రకటించారు. ఇప్పుడీ చిత్రాన్ని జులై 7న ప్రేక్షకుల ముందుకు తీసుకొచ్చేందుకు సిద్ధమవుతున్నారు. ఈ విషయాన్ని పృథ్వీరాజ్‌ సామాజిక మాధ్యమాల ద్వారా వెల్లడించారు. ‘‘అభిమానులు, డిస్ట్రిబ్యూటర్స్‌, థియేటర్‌ యజమానులందరికీ క్షమాపణలు. అనుకోని పరిస్థితుల వల్ల ‘కడువా’ను జులై 7కి వాయిదా వేశాం. ప్రచార కార్యక్రమాలు షెడ్యూల్‌ ప్రకారం కొనసాగిస్తాం. ఈ మాస్‌ యాక్షన్‌ ఎంటర్‌టైనర్‌కు మీ అందరి ప్రేమ, మద్దతు కొనసాగాలి’’ అని ఆయన తన పోస్ట్‌లో రాసుకొచ్చారు. సంగీతం: జేక్స్‌ బిజోయ్‌, ఛాయాగ్రహణం: అభినందన్‌ రామానుజం.

మగాళ్లలో మార్పు తెచ్చే ‘ఫిమేల్‌’

శుభాంగి తంభాలే ప్రధాన పాత్రలో నాని తిక్కిశెట్టి తెరకెక్కించిన చిత్రం ‘ఫిమేల్‌’ (Female). వెలిచర్ల ప్రదీప్‌ రెడ్డి నిర్మాత. దీపిక, తమన్నా సింహాద్రి, బేబీ దీవెన తదితరులు కీలక పాత్రలు పోషించారు. ఈ చిత్ర ఫస్ట్‌లుక్‌ను తెలంగాణ మంత్రి సబితా ఇంద్రారెడ్డి (Sabitha Indra Reddy) ఇటీవల విడుదల చేశారు. ఈ సందర్భంగా ఆమె మాట్లాడుతూ.. ‘‘మహిళలపై జరుగుతున్న అన్యాయాల నేపథ్యంలో రూపొందిన ఈ సినిమా.. ఆడవాళ్లలో ఆత్మవిశ్వాసాన్ని పెంపొందించాలని, మగాళ్లలో మార్పును తీసుకొచ్చే విధంగా ఉండాలని కోరుకుంటున్నా’’ అన్నారు. సంగీతం: వంశీకాంత్‌ రేఖన, కూర్పు: క్రాంతి, ఛాయాగ్రహణం: జగదీష్‌ కొమరి.