Rajinikanth: ‘ఇదే రజనీకాంత్‌ చివరి సినిమా..!’ వైరలవుతోన్న డైరెక్టర్‌ కామెంట్స్‌

హైదరాబాద్‌: సూపర్‌స్టార్‌ రజనీకాంత్‌ (Rajinikanth) తనదైన మేనరిజంతో అభిమానుల హృదయాల్లో సుస్థిర స్థానం దక్కించుకొన్నాడు. ప్రతి సినిమాలోనూ నటనతోనే కాదు ఏదో ఒక ప్రత్యేకమైన స్టైల్‌, పంచ్‌ డైలాగులతో అలరిస్తుంటాడీ స్టార్‌ హీరో. ఏడు పదుల వయసులోనూ కుర్ర హీరోలతో పోటీపడుతూ యువతరానికి ఆదర్శంగా నిలుస్తున్నాడు. 170కి పైగా సినిమాల్లో నటించిన రజనీ మరికొన్ని రోజుల్లో చిత్రపరిశ్రమకు గుడ్‌బై చెప్పనున్నారట. ఇప్పుడీ వార్త ఇండస్ట్రీలో హాట్‌ టాపిక్‌గా మారింది. సోషల్‌ మీడియా వేదికగా దీనిపై రకరకాల కామెంట్స్‌ వినిపిస్తున్నాయి. 

సూపర్‌ స్టార్‌ రజనీకాంత్‌పై ప్రముఖ తమిళ దర్శకుడు మిస్కిన్‌ (Miskin) చేసిన వ్యాఖ్యలు ఇప్పుడు నెట్టింట వైరలవుతున్నాయి. లోకేశ్‌ కనకరాజ్‌ (Lokesh Kangaraj) దర్శకత్వంలో రజనీ సినిమా చేస్తున్నట్లు మిస్కిన్‌ వెల్లడించారు. ఓ ఇంటర్వ్యూలో ఆయన మాట్లాడుతూ..‘‘లోకేశ్‌ కనకరాజ్‌ దర్శకత్వంలో నటించాలని రజనీ ఆసక్తిగా ఉన్నారు. ఈ సినిమా గురించి ఆయనే స్వయంగా లోకేశ్‌ను అడిగారు. బహుశా ఇదే రజనీకాంత్‌కు చివరి సినిమా కావచ్చు’’ అని అన్నారు. ప్రస్తుతం మిస్కిన్‌ చేసిన ఈ వ్యాఖ్యలు సినీరంగంలో చర్చనీయాంశంగా మారాయి. దీనిపై నెటిజన్లు స్పందిస్తున్నారు. ‘తలైవా ఇలాంటి నిర్ణయం తీసుకోరు’ అని ఒకరంటే.. ‘రజనీకాంత్ పై ఇలాంటి ప్రచారాలు ఆపండి’ అని మరో అభిమాని విజ్ఞప్తి చేశారు.

అయితే రజనీ సినిమాలకు గుడ్‌బై చెప్పనున్నారనే వార్తలు రావడం ఇదే తొలిసారి కాదు. ‘బాబా’ సినిమా వచ్చిన సమయంలోనూ ఆయన ఇక తెరపై కనిపించరనే వార్తలు జోరుగా ప్రచారమయ్యాయి. దాని తర్వాత మూడేళ్లు విరామం తీసుకున్న ఆయన.. 2005లో ‘చంద్రముఖి’తో తన మార్క్‌ చూపించి సూపర్‌ హిట్‌ అందుకున్నాడు. నాటి నుంచి వరుస చిత్రాలతో తెలుగు, తమిళ, హిందీ ప్రేక్షకులను అలరిస్తున్నాడు. తాజాగా మిస్కిన్‌ వ్యాఖ్యలతో మరోసారి రజనీ చివరి సినిమా గురించి చర్చలు మొదలయ్యాయి. 

ఇక ఈ సూపర్‌ స్టార్‌ త్వరలోనే ‘జైలర్‌’(Jailer)తో ప్రేక్షకుల ముందుకు రావడానికి సిద్ధమవుతున్నాడు. దీని తర్వాత ఆయన కుమార్తె ఐశ్వర్య రజనీకాంత్‌ దర్శకత్వంలో ‘లాల్‌ సలాం’ (Lal Salaam)లో నటిస్తున్నాడు. లైకా ప్రొడక్షన్స్‌ ప్రతిష్ఠాత్మకంగా నిర్మిస్తున్న ఈ సినిమా షూటింగ్‌ కూడా ప్రారంభమైంది. ఇక దీని తర్వాత లోకేశ్‌ కనకరాజ్‌ సినిమాలో రజనీకాంత్‌ నటించే అవకాశముంది.