Shyam Singha Roy: శ్యామ్‌ సింగరాయ్‌ టీజర్‌ వచ్చేసింది

హైదరాబాద్‌: విభిన్నమైన పాత్రలు ఎంచుకొంటూ తరచూ ప్రేక్షకుల్ని అలరిస్తుంటారు నేచురల్‌ స్టార్‌ నాని. ఆయన హీరోగా తెరకెక్కిన సరికొత్త చిత్రం ‘శ్యామ్‌ సింగరాయ్‌’. ఈ చిత్రానికి రాహుల్‌ సంకృత్యాన్‌ దర్శకత్వం వహించారు. సూపర్‌ నేచురల్‌ థ్రిల్లర్‌ కథాంశంతో ఈ సినిమా తెరకెక్కింది. పోస్ట్‌ ప్రొడెక్షన్‌ పనులు పూర్తి చేసుకుంటోన్న ఈ చిత్రం క్రిస్మస్‌ కానుకగా డిసెంబర్‌ 24న ప్రేక్షకుల ముందుకు రానుంది. ఈ నేపథ్యంలో తాజాగా ‘శ్యామ్‌ సింగరాయ్‌’ టీజర్‌ విడుదల కార్యక్రమం గురువారం ఉదయం ఏఎంబీ మాల్‌లో ఘనంగా జరిగింది. దీనిలో భాగంగా టీజర్‌ను సోషల్‌మీడియా వేదికగా చిత్రబృందం షేర్‌ చేసింది. నటీనటుల నటన, టీజర్‌ ముందు వచ్చే సంభాషణలు ఆకట్టుకునేలా ఉన్నాయి. ‘‘స్త్రీ ఎవ్వరికీ దాసి కాదు. ఆఖరికి దేవుడికి కూడా. ఖబడ్దార్‌‌’’ అంటూ శ్యామ్‌సింగారాయ్‌ పాత్రలో నాని చెప్పే డైలాగ్‌లు ప్రతి ఒక్కరిలో స్ఫూర్తి నింపేలా ఉన్నాయి.

‘టక్‌ జగదీశ్‌’ తర్వాత నాని నటించిన చిత్రమిదే. ఇందులో ఆయన శ్యామ్‌ సింగరాయ్‌, వాసు అనే రెండు భిన్నమైన పాత్రల్లో కనిపిస్తారు. నానికి జోడీగా సాయిపల్లవి, కృతి శెట్టి, మడోన్నా సెబాస్టియన్‌ కథానాయికలుగా నటించారు. నిహారిక ఎంటర్‌టైన్‌మెంట్స్‌ పతాకంపై వెంకట్‌ బోయనపల్లి ఈ చిత్రాన్ని నిర్మిస్తున్నారు. మిక్కీ జే మేయర్‌ స్వరాలు అందిస్తున్నారు.