Vimala Raman: భిన్న అనుభూతిని పంచే... ‘అశ్విన్స్‌’

వసంత్‌ రవి కథానాయకుడిగా తెరకెక్కిన చిత్రం ‘అశ్విన్స్‌’. విమలా రామన్‌ ముఖ్యపాత్ర పోషించారు. తరుణ్‌ తేజ దర్శకుడు. బి.వి.ఎస్‌.ఎన్‌.ప్రసాద్‌ నిర్మాత. హారర్‌ థ్రిల్లర్‌గా రూపొందిన ఈ చిత్రం శుక్రవారం ప్రేక్షకుల ముందుకొస్తోంది. ఈ సందర్భంగా చిత్రబృందం గురువారం హైదరాబాద్‌లో విలేకర్ల సమావేశం నిర్వహించింది. దర్శకుడు మాట్లాడుతూ ‘‘లాక్‌డౌన్‌ సమయంలో ఓ షార్ట్‌ ఫిలిం చేశా. అది చూసిన చిత్ర సమర్పకుడు బాపినీడు ఫోన్‌ చేసి, అదే కాన్సెప్ట్‌ ఆధారంగా సినిమా చేద్దాం అన్నారు. హారర్‌ జోనర్‌లో ప్రేక్షకులకు ఓ కొత్త అనుభూతిని పంచేలా ఈ సినిమా చేశాం. వసంత్‌ రవి, విమలారామన్‌ పాత్రలు గొప్పగా ఉంటాయి’’ అన్నారు. విమలారామన్‌ మాట్లాడుతూ ‘‘తరుణ్‌ కల ఈ సినిమా. కొత్తగా ఏదో చేయాలనే తపనతోనే ఈ సినిమాని తెరకెక్కించాడ’’న్నారు. బి.వి.ఎస్‌.ఎన్‌.ప్రసాద్‌ మాట్లాడుతూ ‘‘ప్రేక్షకులకు భిన్నమైన అనుభవాన్నిచ్చేలా ఈ సినిమా చేశారు’’ అన్నారు. ఇప్పటి తరానికి అవసరమైన సందేశం ఈ సినిమాతో చెప్పామన్నారు వసంత్‌ రవి.