Vishal: విశాల్‌ సినిమా షూటింగ్‌లో ప్రమాదం

విశాల్‌ (Vishal) కథానాయకుడిగా తెరకెక్కుతోన్న ‘మార్క్‌ ఆంటోని’ (mark antony) సినిమా సెట్లో ప్రమాదం జరిగింది. చిత్రీకరణ జరుగుతున్న సమయంలో విశాల్‌ సెట్లోనే ఉన్నారు. షూటింగ్‌ కోసం ఉపయోగించిన ఓ భారీ ట్రక్కు అదుపుతప్పి జూనియర్‌ ఆర్టిస్టులు నిల్చొని ఉన్న చోటుకి వేగంగా దూసుకొచ్చింది. కానీ వెంటనే వారు అప్రమత్తం కావడంతో సురక్షితంగా బయటపడ్డారు. దీనికి సంబంధించిన వీడియోను చిత్ర దర్శకుడు అధిక్‌ రవిచంద్రన్‌ సామాజిక మాధ్యమాలలో పోస్ట్‌ చేశారు. ‘విశాల్‌ కొన్ని సెకన్లలోనే ఈ ప్రమాదం నుంచి తప్పించుకున్నారు. అదృష్టవశాత్తు ఎవరికీ గాయాలు కాలేదు. అందరూ సురక్షితంగా ఉన్నారు. కొన్ని సాంకేతిక కారణాల వల్ల ఈ ప్రమాదం జరిగింది. త్వరలో షూటింగ్‌ పునఃప్రారంభమవుతోంద’ని ట్వీట్‌ చేశారు.