Vishwak sen: అఘోరా శంకర్‌!

విష్వక్‌సేన్‌ కథానాయకుడిగా విద్యాధర్‌ కాగిత దర్శకత్వంలో రూపొందిన చిత్రం ‘గామి’. వి సెల్యులాయిడ్‌ పతాకంపై కార్తీక్‌ శబరీష్‌ నిర్మించారు. చాందిని చౌదరి కథానాయిక. ఈ చిత్ర ఫస్ట్‌లుక్‌ను హైదరాబాద్‌ కామిక్‌కాన్‌లో ఆదివారం విడుదల చేశారు. అందులో విష్వక్‌ అఘోరా గెటప్‌లో కనిపించారు. చుట్టూ చాలామంది అఘోరాలు ఆయన్ని తాకేందుకు ప్రయత్నిస్తుండటం.. ‘‘అతని అతిపెద్ద భయం మానవ స్పర్శ’’ అంటూ పోస్టర్‌పై ఉన్న వ్యాఖ్య ఆసక్తి రేకెత్తించేలా ఉంది. ‘‘ఇదొక భిన్నమైన అడ్వెంచర్‌ డ్రామా. విష్వక్‌ దీంట్లో శంకర్‌ అనే అఘోరాగా కనిపిస్తారు. తనకొక సమస్య ఉంటుంది. మానవ స్పర్శను తట్టుకోలేడు. ఈ చిత్రంలో అఘోరా సెటప్‌తో పాటు మరో రెండు భిన్నమైన గెటప్‌లు ఉంటాయి. త్వరలో విడుదల తేదీ ప్రకటిస్తాం’’ అని చిత్రవర్గాలు తెలిపాయి. నరేశ్‌ కుమారన్‌ సంగీతమందిస్తున్నారు. విశ్వనాథ్‌ రెడ్డి ఛాయాగ్రాహకుడిగా వ్యవహరించారు.