కొడాలి నానికి చరిత్ర తెలియదా?:పరిపూర్ణానంద

హైదరాబాద్‌: తిరుమల డిక్లరేషన్‌ వ్యవహారంలో ఏపీ మంత్రి కొడాలి నాని చేసిన వ్యాఖ్యలు సరికాదని శ్రీపీఠం వ్యవస్థాపకుడు పరిపూర్ణానంద స్వామి అన్నారు. బాధ్యతాయుతంగా ప్రవర్తించాల్సిన మంత్రి విచిత్రంగా మాట్లాడుతున్నారని విమర్శించారు. తిరుమల చరిత్ర ఏనాటిది..?నాని చరిత్ర ఏపాటిది?అని ఆయన వ్యాఖ్యానించారు. సీఎం జగన్‌ మౌనంతో ఆయనే మాట్లాడిస్తున్నారనే తప్పుడు సంకేతాలు ప్రజల్లోకి వెళ్లే అవకాశముందని పరిపూర్ణానంద చెప్పారు. మంత్రి వ్యాఖ్యలతో ప్రభుత్వానికి చాలా ప్రమాదమన్నారు. ‘‘హిందూ దేవాలయాలపై మాట్లాడేందుకు మీకు ఏం హక్కుంది? కొడాలి నానికి చట్టాలు, చరిత్ర తెలియదా?’’ అని ప్రశ్నించారు. ప్రభుత్వం, అధికారులు ఎవరూ దేవాలయాల జోలికి రావొద్దని పరిపూర్ణానంద కోరారు.