Polavaram: పోలవరంలో నాడు-నేడు.. ఫొటో గ్యాలరీ ద్వారా మంత్రి అంబటి వివరణ

పోలవరం: రాష్ట్ర జలవనరులశాఖ మంత్రి అంబటి రాంబాబు మంగళవారం పోలవరం ప్రాజెక్టును సందర్శించారు. ఈ సందర్భంగా పోలవరంలో నాడు-నేడు పేరుతో ఫొటో గ్యాలరీ ఏర్పాటు చేశారు. పోలవరం ప్రాజక్టు 2019 నాటి పరిస్థితి, ప్రస్తుత పరిస్థితిని ఫొటోల ద్వారా వివరించారు. పోలవరం స్పిల్‌వే, కాంక్రీట్‌ డ్యామ్‌, అప్రోచ్‌ ఛానల్‌ పురోగతిపై మంత్రి వివరణ ఇచ్చారు. ఈ సందర్భంగా అంబటి మీడియాతో మాట్లాడుతూ...‘‘ పోలవరం ప్రాజెక్టుపై తెదేపా అధినేత చంద్రబాబు నిన్న అబద్ధాలు చెప్పారు. ప్రజలకు వాస్తవాలు చెప్పేందుకే ప్రాజెక్టు వద్దకు వచ్చా. మేం అధికారంలోకి వచ్చాక పోలవరం ప్రాజెక్టు పనులు వేగవంతం చేశాం. గైడ్‌బండ్‌ కుంగటం వల్ల ప్రాజెక్టుకు ఎలాంటి నష్టం లేదు. స్పిల్‌ ఛానల్‌ దెబ్బతినకూడదనే.. డిజైన్‌లో లేకున్నా గైడ్‌బండ్‌ కట్టాం’’ అని మంత్రి వివరించారు.