Chandrababu: భక్తులు అవస్థలు పడుతుంటే తితిదే ఏం చేస్తోంది: చంద్రబాబు

అమరావతి: తిరుమల శ్రీవారి సర్వదర్శనం టోకెన్ల కోసం భక్తులు పడుతున్న కష్టాలపై తెదేపా అధినేత చంద్రబాబు తీవ్ర ఆవేదన వ్యక్తం చేశారు. వేలాది మంది భక్తులు గంటల తరబడి పసిబిడ్డలతో మండుటెండలో అవస్థలు పడుతుంటే తితిదే ఏం చేస్తోందని ప్రశ్నించారు. భక్తులకు తాగు నీరు, క్యూ లైన్లలో నీడ ఉండేలా చూడలేరా? అని నిలదీశారు.

తితిదే చేతగాని నిర్ణయాలు శ్రీవారిని భక్తులకు దూరం చేసేలా ఉన్నాయని చంద్రబాబు ఆగ్రహం వ్యక్తం చేశారు. దర్శనాలు, వసతికి సంబంధించి చాలా రోజులుగా అధికారుల అలసత్వం కనిపిస్తోందని మండిపడ్డారు. తిరుమలలాంటి ఆధ్యాత్మిక కేంద్రాన్ని ఆదాయ వనరు కోణంలో చూడటం సరికాదన్నారు. కొండపైకి వెళ్లడానికి కూడా ఆంక్షలు విధించడం భక్తుల మనోభావాలను దెబ్బతీయడమేనని ఆక్షేపించారు. భక్తులకు తితిదే క్షమాపణలు చెప్పాలని చంద్రబాబు డిమాండ్‌ చేశారు.