భవన నిర్మాణ కార్మికులకు ₹10వేలు ఇవ్వాలి

సీఎం జగన్‌కు నారా లోకేష్‌ లేఖ

అమరావతి: భవన నిర్మాణ కార్మికులకు రూ.10 వేలు చొప్పున ఆర్థిక సాయం చేయాలంటూ ముఖ్యమంత్రి జగన్‌కు తెదేపా జాతీయ ప్రధాన కార్యదర్శి నారా లోకేష్ లేఖ రాశారు. లాక్‌డౌన్‌ కారణంగా రాష్ట్రంలో 50 లక్షల మంది భవననిర్మాణ కార్మికులకు ఉపాధి లేకుండా పోయిందని పేర్కొన్నారు. ఈ ఏడాది ఇసుక సమస్య కారణంగా తీవ్ర ఇబ్బందులు ఎదుర్కొన్నారని, ఇప్పుడు పూట గడవని దుర్భర జీవితం గడుపుతున్నారని లోకేశ్‌ ఆవేదన వ్యక్తం చేశారు. నూతన ఇసుక విధానం వల్ల ఉపాధి లేక, కుటుంబాలను పోషించలేక కొందరు ఆత్మహత్యకు పాల్పడటం ఎంతో కలచివేసిందని, ఇప్పుడు లాక్‌డౌన్‌ వారిని మరింత దెబ్బతీసిందని సీఎం దృష్టికి తీసుకెళ్లారు. కార్మికులకు అందుబాటులో ఉన్న రూ.1900 కోట్ల బిల్డింగ్ సెస్ వారి సంక్షేమానికే ఖర్చు చేయాలని కోరారు. చంద్రన్న బీమాను పునరుద్ధరించడంతో పాటు, వారి భవిష్యత్‌కు ప్రభుత్వం భరోసా కల్పించేలా చర్యలు తీసుకోవాలని లేఖలో పేర్కొన్నారు.