దిల్లీలో విపక్ష నేతల భేటీ నేడు

దిల్లీ: సార్వత్రిక ఎన్నికలు(2024) సమీపిస్తున్న వేళ విపక్షాలన్నింటినీ ఏకతాటిపైకి తీసుకొచ్చే ప్రయత్నాలు ముమ్మరమయ్యాయి. ఎన్నికలకు సంబంధించిన విషయాలు, ఈవీఎంల సామర్థ్యం తదితర అంశాలపై చర్చించుకుందామంటూ ఎన్సీపీ అధినేత శరద్‌ పవార్‌ వివిధ ప్రతిపక్ష నేతలను ఆహ్వానించారు. గురువారం సాయంత్రం 6 గంటలకు దిల్లీలో ఈ సమావేశం జరుగుతుందని విశ్వసనీయ వర్గాలు తెలిపాయి. ఎన్నికలు స్వేచ్ఛగా, నిష్పక్షపాతంగా నిర్వహించడంతో పాటు ఈవీఎంలపై తలెత్తుతున్న సందేహాలను ప్రధాన ఎన్నికల కమిషనర్‌ నివృత్తి చేయాల్సి ఉంటుందని శరద్‌ పవార్‌ పేర్కొన్నారు. చిప్‌ కలిగి ఉన్న ఏ యంత్రమైనా హైజాక్‌కు గురయ్యే అవకాశాన్ని తోసిపుచ్చలేమంటూ నిపుణులు వెల్లడిస్తున్న వివిధ అంశాలను పవార్‌ ఆహ్వాన లేఖల్లో ప్రస్తావించారు.