Kodali Nani: ఉన్నోళ్ల కార్లకు బ్రేక్‌లు వేయకుండా రోడ్లు వేయాలా?: కొడాలి నాని

గుడ్లవల్లేరు, న్యూస్‌టుడే: బెంజి కార్లలో తిరిగేవారు బ్రేకులు వేయకుండా నడిపేలా రోడ్లు ఉంటేనే అభివృద్ధా.. కిలోమీటరుకో గుంత ఉంటే ప్రతిపక్షాలు గోల చేస్తున్నాయని మాజీ మంత్రి, గుడివాడ వైకాపా ఎమ్మెల్యే కొడాలి నాని(Kodali Nani) పేర్కొన్నారు. విద్యుత్తు, తాగు, సాగునీరు, ఇళ్ల అభివృద్ధి వారికి కనిపించడం లేదని వ్యాఖ్యానించారు. కృష్ణా జిల్లాలో శనివారం నిర్వహించిన పలు కార్యక్రమాల్లో పాల్గొని ఆయన మాట్లాడారు. గుడివాడ నియోజకవర్గంలో చంద్రబాబు హయాంలో ఇళ్ల స్థలాల పంపిణీ కానీ, మంచినీటి చెరువుల అభివృద్ధి కానీ చేసినట్లు నిరూపిస్తే తాను రాజకీయ సన్యాసం తీసుకుంటానని చెప్పారు. ఎంపీ వల్లభనేని బాలశౌరి మాట్లాడుతూ అంబానీ, అదానీలకు రూ.వేల కోట్లు రుణాలిచ్చే బ్యాంకులు కౌలు రైతులకు కూడా ఇవ్వాలని కోరారు.