Kasani Gnaneshwar: తెదేపాకు కాసాని జ్ఞానేశ్వర్ రాజీనామా

హైదరాబాద్‌: తెలంగాణ తెదేపా అధ్యక్షుడు కాసాని జ్ఞానేశ్వర్‌ ఆ పార్టీకి రాజీనామా చేశారు. పార్టీ రాష్ట్ర అధ్యక్ష పదవితో పాటు, పార్టీ సభ్యత్వానికి రాజీనామా చేస్తున్నట్లు ప్రకటించారు. తెలంగాణ ఎన్నికల్లో పోటీకి తెదేపా అధిష్ఠానం నిరాకరించిన నేపథ్యంలో ఆయన ఈ నిర్ణయం తీసుకున్నట్లు సమాచారం. తెతెదేపా శ్రేణులతో ఆదివారం ఎన్టీఆర్‌ భవన్‌లో సమావేశమైన ఆయన తెలంగాణ అసెంబ్లీ ఎన్నికల్లో పోటీకి అధిష్ఠానం నిరాకరించినట్లు శ్రేణులకు తెలిపారు. దీనిపై కొందరు నేతలు స్పందిస్తూ ఎన్నికల్లో పోటీ చేయాల్సిందేనని పట్టుబట్టారు. ఈ నేపథ్యంలోనే కాసాని భావోద్వేగానికి గురయ్యారు. ఈ పరిణామాల నేపథ్యంలో తాజాగా తెదేపాకు రాజీనామా చేస్తూ ఆయన నిర్ణయం తీసుకోవడం గమనార్హం.