TS news: కేసీఆర్‌ నీడను చూసి తానే భయపడుతున్నారు: కిషన్‌రెడ్డి

వరంగల్‌: ముఖ్యమంత్రి కేసీఆర్‌ తన నీడను చూసి తానే భయపడుతున్నారని కేంద్ర మంత్రి కిషన్‌రెడ్డి వ్యాఖ్యానించారు. హుజూరాబాద్‌లో ఈటల రాజేందర్‌ను ఓడించేందుకు చాలా కుట్రలు చేస్తున్నారని విమర్శించారు. వరంగల్‌లో నిర్వహించిన జన ఆశీర్వాద యాత్రలో కిషన్‌రెడ్డి మాట్లాడుతూ.. ఎన్ని కుట్రలు చేసినా.. హుజూరాబాద్‌లో విజయం భాజపాదేనని ధీమా వ్యక్తం చేశారు. ప్రధాని మోదీ కరోనాను సమర్థంగా కట్టడి చేశారన్నారు. అందరికీ ఉచిత వ్యాక్సినేషన్‌ యజ్ఞంలా కొనసాగుతోందని చెప్పారు. అంతకుముందు హన్మకొండలో మాట్లాడుతూ... ఏడేళ్లలో ముఖ్యమంత్రి కేసీఆర్‌ రాష్ట్రాన్ని దివాలా తీయించారని ఆరోపించారు. కాంట్రాక్టుల పేరుతో రూ.వేల కోట్లు దోచుకున్నారని విమర్శించారు.  ప్రజలు పన్నుల రూపంలో కట్టిన ధనాన్ని దుర్వినియోగం చేశారన్నారు. కుర్చీ, కుటుంబం కోసం సీఎం కేసీఆర్‌ దేనికైనా సిద్ధపడతారని ఆరోపించారు. అంతకుముందు తొర్రూర్‌, వర్ధన్నపేటలో జరిగిన కార్యక్రమంలో కిషన్‌రెడ్డి మాట్లాడుతూ.. అధికార తెరాసపై విమర్శనాస్త్రాలు సంధించారు.