YSRCP: సత్తెనపల్లిలో ప్రలోభాల పర్వం.. రెండో రోజు 5వేలకు పైగా చీరలు స్వాధీనం

సత్తెనపల్లి: పల్నాడు జిల్లా సత్తెనపల్లి పారిశ్రామిక వాడలోని గోదాములో వైకాపా నేతలు నిల్వ ఉంచిన వేలాది చీరలను ఫ్లయింగ్‌ స్క్వాడ్‌ అధికారులు స్వాధీనం చేసుకున్నారు. ఎన్నికల్లో ఓటర్లకు పంపిణీ చేసేందుకు చీరలు తీసుకొచ్చి సత్తెనపల్లిలోని గోదాములో నిల్వచేశారనే సమాచారంతో అధికారులు తనిఖీలు నిర్వహించారు. జగన్‌ బొమ్మ ముద్రించి ఉన్న బాక్సుల్లోని 5,472 చీరలను స్వాధీనం చేసుకున్నట్టు అధికారులు తెలిపారు. బుధవారం కూడా సత్తెనపల్లిలో వైకాపా నేత, రాష్ట్ర రైతు సలహా మండలి సభ్యులు కళ్లె విజయభాస్కర్‌రెడ్డికి చెందిన కేవీఆర్‌ మార్ట్‌లో రెండు వేల చీరలు స్వాధీనం చేసుకున్న విషయం తెలిసిందే. వైకాపా ప్రలోభాలపై సత్తెనపల్లి నియోజకవర్గంలో విస్తృత చర్చ జరుగుతోంది.