Pawan Kalyan: వైకాపా ఇచ్చిన ఆ హామీ ఏమైంది?: పవన్‌

అమరావతి: ఏపీలో రోజూ అన్నదాతలు ఆత్మహత్య చేసుకుంటున్నారని.. అప్పుల ఊబిలో ఉన్న రైతులను రక్షించాల్సిన బాధ్యత ప్రభుత్వానిదేనని జనసేన అధినేత పవన్‌ కల్యాణ్‌ అన్నారు. అప్పుల బాధ భరించలేక ఆత్మహత్య చేసుకోవడం విషాదకరమని చెప్పారు. విధులు నిర్వర్తించడంలో వ్యవస్థలు విఫలమవుతున్నాయని.. రైతులు ఆత్మహత్య చేసుకునే పరిస్థితి రాకుండా అవి పనిచేయాలన్నారు. ఈ మేరకు పవన్‌ ఓ ప్రకటన విడుదల చేశారు.

ఎన్నికల సమయంలో వైకాపా రూ.50వేల పంట పెట్టుబడి హామీ ఇచ్చిందని.. అది ఏమైందని పవన్‌ ప్రశ్నించారు. ఇప్పటివరకు ఎన్ని కుటుంబాలకు పంట పెట్టుబడి అందించారో చెప్పాలని ఆయన డిమాండ్‌ చేశారు. ప్రైవేట్‌ వడ్డీ వ్యాపారుల వద్ద రైతులు అప్పులు చేసి ఊబిలో కూరుకుపోతున్నారని.. అన్నంపెట్టే రైతులను కూడా కులాల వారీగా విభజిస్తారా? అని పవన్‌ నిలదీశారు.