Kishanreddy: కిషన్‌రెడ్డి దీక్ష భగ్నం చేసేందుకు పోలీసుల యత్నం

హైదరాబాద్‌: కేంద్రమంత్రి, భాజపా రాష్ట్ర అధ్యక్షుడు కిషన్‌రెడ్డి ఇందిరాపార్క్‌ వద్ద చేపట్టిన 24గంటల దీక్షను భగ్నం చేసేందుకు పోలీసులు యత్నించడం ఉద్రిక్తతకు దారి తీసింది. బుధవారం సాయంత్రం 6గంటల వరకే దీక్షకు అనుమతి ఉందని పోలీసులు చెబుతుండగా.. గురువారం ఉదయం 6గంటల వరకు దీక్ష చేస్తానని కిషన్‌రెడ్డి స్పష్టం చేశారు. దీక్షను భగ్నం చేస్తే తీవ్ర పరిణామాలుంటాయని పోలీసులను హెచ్చరించారు. ప్రభుత్వం ఎన్ని కుట్రలు చేసినా దీక్ష కొనసాగుతుందని స్పష్టం చేశారు. శాంతియుత దీక్ష వల్ల పోలీసులకు ఇబ్బందేంటని ప్రశ్నించారు. దీక్షా స్థలికి చేరుకున్న పోలీసులను భాజపా కార్యకర్తలు, నిరుద్యోగులు అడ్డుకుని వాగ్వాదానికి దిగారు. దీంతో ఇందిరాపార్క్‌ ధర్నా చౌక్‌ వద్ద ఉద్రిక్తత నెలకొంది.