Revanth Reddy: పార్టీని దెబ్బతీసే విధంగా మాట్లాడితే శాశ్వత బహిష్కరణ: రేవంత్‌రెడ్డి

హైదరాబాద్: కాంగ్రెస్‌ పార్టీకి వ్యతిరేకంగా, పార్టీని దెబ్బ తీసే విధంగా ఎవరైనా మాట్లాడితే క్రమశిక్షణ చర్యలు తప్పవని పీసీసీ అధ్యక్షుడు రేవంత్‌ రెడ్డి హెచ్చరించారు. కాంగ్రెస్‌కు ఐకమత్యమే మహాబలమన్నారు. ఈ మేరకు ట్విటర్‌ వేదికగా రేవంత్‌రెడ్డి స్పందించారు. బహిరంగంగా పార్టీ ముఖ్య నాయకులకు వ్యతిరేకంగా మాట్లాడినా, విమర్శలు చేసినా, సామాజిక మాధ్యమాల ద్వారా విమర్శలు చేసినా ఉపేక్షించేది లేదని రేవంత్‌ వెల్లడించారు. ఎవరైనా నియమ నిబంధనలు ఉల్లంఘించినట్లయితే పార్టీ నుంచి శాశ్వతంగా బహిష్కరించడంతోపాటు క్రిమినల్‌ కేసులను కూడా ఎదుర్కోవాల్సి వస్తుందని హెచ్చరించారు. ఏఐసీసీ ప్రధాన కార్యదర్శి కేసీ వేణుగోపాల్‌, రాష్ట్ర వ్యవహారాల ఇంఛార్జి మాణికం ఠాగూర్‌, మాజీ పీసీసీ అధ్యక్షుడు ఉత్తమ్‌కుమార్‌ రెడ్డి, మాజీ సీఎల్పీ నేత జానారెడ్డి, సీఎల్పీ నేత భట్టి విక్రమార్కను తన ట్వీట్‌కు ట్యాగ్‌ చేశారు.