Jagga Reddy: సీఎం అభ్యర్థి విషయంలో మాకు స్పష్టత ఉంది: జగ్గారెడ్డి

హైదరాబాద్: తెలంగాణలో కాంగ్రెస్ పార్టీయే అధికారంలోకి వస్తుందని సంగారెడ్డి ఎమ్మెల్యే జగ్గారెడ్డి ధీమా వ్యక్తం చేశారు. కాంగ్రెస్‌ విజయాన్ని ఏ విధంగానైనా అడ్డుకోవాలని భారాస ప్రయత్నిస్తోందన్నారు. లేనివి ఉన్నట్లు సృష్టిస్తూ రాష్ట్ర ప్రజలను తప్పుదారి పట్టిస్తోందని మండిపడ్డారు. రాష్ట్ర ప్రజలు భారాస మాటలు నమ్మొద్దన్నారు. గాంధీభవన్‌లో నిర్వహించిన మీడియా సమావేశంలో జగ్గారెడ్డి మాట్లాడారు.

‘‘రుణ మాఫీ విషయంలో సీఎం కేసీఆర్‌ మాటతప్పారు. కాంగ్రెస్ అధికారంలోకి వస్తే ఒకేసారి రూ.2 లక్షలు రుణమాఫీ చేస్తాం. కాంగ్రెస్‌ పార్టీలో సీఎం అభ్యర్థి విషయంలో మాకు స్పష్టత ఉంది. పార్టీ హైకమాండ్ నిర్ణయం మేరకు సీఎం ఎవరనేది నిర్ణయం తీసుకుంటాం. మంత్రి హరీశ్‌రావు చేసిన వ్యాఖ్యలపై ఇప్పుడు కాదు.. సమయం వచ్చినప్పుడు స్పందిస్తా. జీవోల విషయంలోనూ కేసీఆర్‌ ప్రజలను తప్పుదారి పట్టిస్తున్నారు. కాంగ్రెస్ ప్రభుత్వం అధికారంలోకి వస్తే అన్ని పనులు అవుతాయి. భారాస పథకాల గురించి చెబితే ప్రజలు నమ్మరని తెలిసే తెలంగాణ వాదాన్ని తెరపైకి తెస్తున్నారు. తెలంగాణ ఉద్యమకారులకు ఈ ప్రభుత్వం ఏం చేసింది? తెలంగాణలో కాంగ్రెస్‌ 70 సీట్లు గెలుస్తుంది. అధికారంలోకి వస్తుంది’’ అని జగ్గారెడ్డి ధీమా వ్యక్తం చేశారు.