గణాంకాలు అబద్ధం చెప్పవు : రాహుల్‌ గాంధీ

దిల్లీ: కొవిడ్‌ మరణాల విషయంలో గణాంకాలు అబద్ధం చెప్పవని.. ప్రజలను మభ్య పెట్టడానికి మోదీనే తప్పుడు లెక్కలు చెబుతారని కాంగ్రెస్‌ అగ్రనేత రాహుల్‌ గాంధీ విమర్శించారు. ప్రపంచ ఆరోగ్య సంస్థ (డబ్ల్యూహెచ్‌ఓ) ఇటీవల విడుదల చేసిన కొవిడ్‌ మరణాల నివేదికను ట్వీట్‌  చేస్తూ.. ప్రభుత్వ విధానాలను ఆయన ఎద్దేవా చేశారు. భారత్‌లో మొత్తం 4.7 మిలియన్ల మంది కరోనాతో మృత్యువాత పడితే.. ప్రభుత్వం తప్పుడు గణాంకాలను చూపించిందని విమర్శించారు.

మృతుల కుటుంబాలకు రూ.4 లక్షలు నష్టపరిహారం చెల్లించాలని రాహుల్‌ డిమాండ్‌ చేశారు. కొవిడ్‌ కారణంగా ప్రాణాలు కోల్పోయిన వారి కుటుంబాలకు ప్రభుత్వం ఆసరాగా నిలవాలన్నారు. డబ్ల్యూహెచ్‌ఓ నివేదిక ప్రకారం ప్రపంచ వ్యాప్తంగా 14.9 మిలియన్ల మంది కొవిడ్‌తో ప్రాణాలు కోల్పోయారు. భారత్‌లో 4.7 మిలియన్ల మరణాలు సంభవించాయి. ఈ గణాంకాలు లెక్కగట్టేందుకు డబ్ల్యూహెచ్‌ఓ తీసుకున్న ప్రమాణాలను,సమాచార సేకరణ విధానాలను భారత్‌ తీవ్రంగా వ్యతిరేకించింది.