Chandrababu Arrest: విశాఖలో తెదేపా శ్రేణుల కొవ్వొత్తుల ర్యాలీ.. అడ్డుకున్న పోలీసులు

విశాఖపట్నం: చంద్రబాబుకు మద్దతుగా విశాఖ తూర్పు నియోజకవర్గం ఆరిలోవలో తెదేపా నేతల కొవ్వొత్తుల ర్యాలీలో ఉద్రిక్తత చోటు చేసుకుంది. ఆరిలోవ షిర్డీ సాయి ఆలయం వద్ద నుంచి స్థానిక ఎమ్మెల్యే వెలగపూడి రామకృష్ణబాబు ఆధ్వర్యంలో చేపట్టిన ర్యాలీని పోలీసులు అడ్డుకున్నారు. అనుమతి లేకుండా కొవ్వొత్తుల ర్యాలీ, నిరసన చేయడానికి వీల్లేదని చెప్పడంతో పోలీసులతో ఆయన వాగ్వాదానికి దిగారు. ఎట్టి పరిస్థితుల్లో ర్యాలీ నిర్వహించి తీరుతామని ఎమ్మెల్యే, తెదేపా నాయకులు ముందుకు కదలడంతో పోలీసులు అడ్డుకున్నారు.  ఈక్రమంలో పోలీసులు, తెదేపా శ్రేణులకు మధ్య తోపులాట జరిగింది. పలువురు నేతలను అదుపులోకి తీసుకుని అరిలోవ పోలీస్‌స్టేషన్‌కు తరలించారు. పోలీసులు తమ పట్ల విచక్షణా రహితంగా ప్రవర్తించారని మహిళా కార్యకర్తలు ఆరోపించారు.