AP News: జగన్‌ చేతికి పవరిస్తే.. ప్రజలకు పవర్‌ లేకుండా చేశారు: పట్టాభి

అమరావతి: సీఎం జగన్‌ అసమర్థత, చేతగానితనం వల్లే రాష్ట్రంలో విద్యుత్‌ రంగం సర్వనాశనమైందని తెదేపా జాతీయ అధికార ప్రతినిధి కొమ్మారెడ్డి పట్టాభిరామ్‌ మండిపడ్డారు. జగన్‌ మోహన్‌రెడ్డి చేతికి పవర్‌ ఇస్తే.. ప్రజలకు పవర్‌ లేకుండా చేశారని దుయ్యబట్టారు. విద్యుత్‌ వ్యవస్థ సరిగా లేకపోతే రాష్ట్రానికి పరిశ్రమలెలా వస్తాయి? యువతకు ఉపాధి, ఉద్యోగాలు ఎలా లభిస్తాయని నిలదీశారు.  కొన్నాళ్లు పోతే సాయంత్రం ఒక గంట మాత్రమే వీధిలైట్లు వెలుగుతాయని ప్రభుత్వ బోర్డులు పెడుతుందేమోనని ఎద్దేవా చేశారు.  జగన్‌ రివర్స్‌ గేర్‌ పాలనలో త్వరలోనే ప్రజలు లాంతర్లు పట్టుకొని తిరగడం ఖాయమని చెప్పారు. విద్యుత్‌ శాఖలో ఏం జరుగుతుందో మంత్రి బాలినేనికి తెలియదని, జగన్‌ చెప్పింది చేయడం, ఆయన హవాలా సొమ్ముని విదేశాలకు తరలించడమే బాలినేని పని అని మండిపడ్డారు.