Rahul Gandhi: ఇవేనా మంచి రోజులు..?

దిల్లీ: ఇటీవల కేంద్రంపై వరుస ఆరోపణలతో విరుచుకుపడుతున్న కాంగ్రెస్ అగ్రనేత రాహుల్‌ గాంధీ తాజాగా మరోసారి ప్రభుత్వంపై విమర్శనాస్త్రాలు సంధించారు. చాలా రాష్ట్రాల్లో ఉపాధి హామీ కూలీలకు వేతనాలు ఇవ్వడం లేదంటూ ట్విటర్‌ వేదికగా మంగళవారం మండిపడ్డారు. ‘ఇవేనా మీరు చెప్పిన మంచి రోజులు?’ అంటూ భాజపా ప్రభుత్వాన్ని ప్రశ్నించారు. కరోనా మహమ్మారి విస్తృతంగా వ్యాప్తి చెందుతున్న ప్రస్తుత తరుణంలో పేదలను ఆర్థికంగా ఆదుకోకపోగా.. సకాలంలో వేతనాలు చెల్లించకుండా వారి హక్కులను సైతం కాలరాస్తోందంటూ ఆరోపించారు. చాలా మందికి కుటుంబ పోషణ సైతం భారంగా మారిందని ఆవేదన వ్యక్తం చేశారు. రఫేల్‌, పెరిగిన పెట్రో ధరలు, ప్రభుత్వ రంగ సంస్థలను ప్రయివేటుపరం చేయడం లాంటి పలు అంశాలను ప్రస్తావిస్తూ ప్రధాని నరేంద్ర మోదీపై పరోక్షంగా విమర్శలు చేశారు.