Khushboo: నటి గాయత్రీ రఘురామ్‌ ఆరోపణలను ఖండించిన ఖుష్బూ

కోయంబత్తూరు: తమిళనాడు భాజపా(BJP)లో మహిళలకు గౌరవం, భద్రత లేవంటూ ఇటీవల నటి గాయత్రీ రఘురామ్‌(Gayathri Raghuramm) చేసిన ఆరోపణలను ఆ పార్టీ జాతీయ కార్యనిర్వాహక సభ్యురాలు ఖుష్బూ సుందర్‌ (Khushboo Sundar)ఖండించారు. ఇటీవల భాజపాకు రాజీనామా చేసిన సందర్భంగా గాయత్రి చేసిన ఆరోపణల్ని ఖండించారు. రాష్ట్రంలోని భాజపాలో మహిళలకు గౌరవం, రక్షణ ఉన్నాయన్నారు. సంక్రాంతి నేపథ్యంలో ఆదివారం వెల్లలూరులో సంప్రదాయ ఎడ్ల బండి పోటీలను ప్రారంభించిన సందర్భంగా ఆమె మీడియాతో మాట్లాడారు. భాజపాలో మహిళలకు భద్రత ఉందన్నారు. మహిళలంతా తమ పార్టీని వీడటంలేదని, తాను కూడా ఆ పార్టీలోనే ఉన్నానని చెప్పారు. భాజపా రాష్ట్ర చీఫ్‌ అన్నామలై ధైర్యంగా, బలమైన నిర్ణయాలు తీసుకుంటూ తనకు మద్దతుగా పోరాటం చేశారని కొనియాడారు. 

రాష్ట్రాన్ని తమిళగం లేదా తమిళనాడు అని పిలిచినా తప్పులేదన్న ఖుష్బూ.. తాను ముంబయిలో పుట్టినా తమిళ మహిళనేనన్నారు. గత 36 ఏళ్లుగా ఇక్కడే నివసిస్తున్నానంటూ ఆమె చెప్పుకొచ్చారు. సంక్రాంతి కానుకగా చెరకు, రూ.1000లను డీఎంకే ప్రభుత్వం ఓ భిక్షలా ఇస్తోందంటూ విమర్శలు గుప్పించారు. అంతకుముందు ఎడ్లబండిపై కొద్దిదూరం పాటు ప్రయాణించిన ఖుష్బూ అందరినీ ఉత్సాహపరిచారు.