వైఎస్‌ఆర్‌ జనం కోసం జీవించారు‌: విజయమ్మ

హైదరాబాద్‌: వైఎస్‌ఆర్‌ తెలంగాణ పార్టీ ఆవిర్భావ సభ రాయదుర్గం జేఆర్‌సీ కన్వెన్షన్‌ సెంటర్‌లో ప్రారంభమైంది. ఈ సందర్భంగా వైఎస్‌ఆర్‌ విగ్రహానికి విజయమ్మ, షర్మిల పూలమాల వేసి నివాళులర్పించారు. అనంతరం విజయమ్మ మాట్లాడుతూ.. ‘‘శత్రువులైనా, ప్రత్యర్థులైనా వైఎస్‌ఆర్‌ను అభిమానించారు. నాయకుడంటే వైఎస్‌ఆర్‌లా ఉండాలి. ఆయన మరణంలేని నాయకుడు. తెలంగాణలో వైఎస్‌ కోసం ప్రాణాలు విడిచిన వారు ఉన్నారు. ఆయన చేపట్టిన ప్రాజెక్టులు ఇప్పటికీ పూర్తి చేయలేదు. వైఎస్‌ కల అసంపూర్తిగా మిగిలిపోయింది. తెలుగువారి గుండె చప్పుడు వైఎస్‌. షర్మిలను ఆశీర్వదించిన ప్రతి ఒక్కరికి నమస్సులు. జగన్‌, షర్మిల వైఎస్‌ ఆత్మీయత, హావభావాలు పుణికిపుచ్చుకున్నారు. ఇద్దరూ వేర్వేరు రాష్ట్రాలు, పార్టీలకు ప్రతినిధులు. తెలంగాణలో వైఎస్‌ఆర్‌ పాలనకు పునాదులు పడబోతున్నాయి. తండ్రి కల సాకారం చేసేందుకు షర్మిల రాజకీయాల్లోకి వచ్చారు. తండ్రి ఆశయ సాధన కోసం మీ ముందుకు వస్తోంది. మీ కష్టాల్లో షర్మిల తోడుగా ఉంటుంది. మీ కుటుంబ సభ్యురాలిగా అక్కున చేర్చుకోండి’’ అని విజయమ్మ అన్నారు.