రఫేల్‌.. రప్ఫాడిస్తాయ్‌: సచిన్‌

ఇంటర్‌నెట్‌ డెస్క్‌: భారత భూభాగంపై అడుగు పెట్టిన శత్రు భయంకర రఫేల్‌ యుద్ధ విమానాలకు దిగ్గజ క్రికెటర్‌ సచిన్‌ తెందూల్కర్‌ స్వాగతం చెప్పారు. వీటి చేరికతో మన పోరాట సామర్థ్యం మరింత బలోపేతం అయిందని పేర్కొన్నారు. భారత వాయుసేనకు అభినందనలు తెలియజేశారు. ఈ మేరకు ఆయన ట్వీట్‌ చేశారు.

‘రఫేల్‌ యుద్ధ విమానాలు మన సైన్యంలో భాగమైనందుకు భారత వైమానిక దళానికి హృదయపూర్వక అభినందనలు. విశ్రాంతి లేకుండా గగనతలం నుంచి మన దేశాన్ని కాపాడుతున్న మన సైనిక బలగాలు ఇప్పుడు మరింత ఉన్నతీకరణ చెందాయి. జై హింద్‌’ అని సచిన్‌ ట్వీట్‌ చేశారు. తెందూల్కర్‌కు వాయుసేనతో అనుబంధం ఉండటం గమనార్హం. అంతకు ముందు టీమ్‌ఇండియా ఓపెనర్‌ శిఖర్‌ ధావన్‌, వెటరన్‌ క్రికెటర్‌ సురేశ్ రైనా సైతం వాయుసేనకు అభినందనలు తెలిపిన సంగతి తెలిసిందే.

శత్రువుల వెన్నులో వణుకు పుట్టించే సామర్థ్యం రఫేల్‌ యుద్ధ విమానాల సొంతం. అణ్వస్త్రాలతో దాడిచేయగల సామర్థ్యం ఉన్న ఇవి చైనా, పాకిస్థాన్‌ సరిహద్దు వివాదాల నేపథ్యంలో కీలకంగా మారే అవకాశం ఉంది. ఫ్రాన్స్‌కు చెందిన దసో ఏవియేషన్‌ కంపెనీ నుంచి 36 రఫేల్‌ విమానాలను కొనుగోలుకు ఎన్డీయే ప్రభుత్వం 2016లో రూ.59వేల కోట్లతో ఒప్పందం కుదుర్చుకుంది. అందులో భాగంగా ఐదు విమానాలు ఫ్రాన్స్‌ నుంచి బయలుదేరి యూఏఈకి చేరుకొని అక్కడి నుంచి అంబాలకు బుధవారం చేరుకున్నాయి. వీటికి ఎస్కార్టులుగా రెండు సుఖోయ్‌ యుద్ధ విమానాలు రావడం గమనార్హం.