పాక్‌ 181/0.. ఇంగ్లాండ్‌ 657 ఆలౌట్‌

రావల్పిండి: పాకిస్థాన్‌-ఇంగ్లాండ్‌ తొలి టెస్టులో పరుగుల వరద పారుతోంది. ఫ్లాట్‌ పిచ్‌ మీద ఇంగ్లాండ్‌ కేవలం నాలుగు సెషన్లలో 657 పరుగులు చేసి ఔరా అనిపిస్తే.. పాకిస్థాన్‌ కూడా ఆ జట్టుకు దీటుగా స్పందిస్తోంది. రెండో రోజు తొలి ఇన్నింగ్స్‌ ఆరంభించిన పాక్‌ ఆట ఆఖరుకు 51 ఓవర్లలో వికెట్‌ నష్టపోకుండా 181 పరుగులు చేసింది. ఇంగ్లాండ్‌ బ్యాటర్లలా దూకుడుగా ఆడకపోయినా.. పాక్‌ ఓపెనర్లు అబ్దుల్లా షఫిక్‌ (89; 158 బంతుల్లో 10×4, 2×6), ఇమాముల్‌ హక్‌ (90; 148 బంతుల్లో 13×4, 1×6) నిలకడగా బ్యాటింగ్‌ చేస్తూ జట్టును మంచి స్థితిలో నిలిపారు. అయితే ఆ జట్టు ఇంకా 476 పరుగులు వెనుకబడి ఉండడంతో మూడో రోజు పూర్తిగా బ్యాటింగ్‌ చేయకుంటే ఫాలోఆన్‌ ముప్పు తప్పకపోవచ్చు. అంతకుముందు ఓవర్‌నైట్‌ స్కోరు 506/4తో బ్యాటింగ్‌ కొనసాగించిన ఇంగ్లాండ్‌.. ఇంకో 151 పరుగులు చేసి మిగతా 6 వికెట్లు కోల్పోయింది. తొలి రోజే సెంచరీ పూర్తి చేసిన బ్రూక్‌ 153 పరుగుల వద్ద వెనుదిరిగాడు. పాక్‌ బౌలర్లలో జహిద్‌ మహమూద్‌ 4, నసీమ్‌ షా 3 వికెట్లు పడగొట్టారు. తొలి రోజు 75 ఓవర్ల ఆటే సాధ్యం కాగా.. రెండో రోజు 77 ఓవర్లే పడ్డాయి.