IPL-SRH: సన్‌రైజర్స్‌ హైదరాబాద్‌కు షాక్.. మూడు మ్యాచ్‌లకు కీలక ఆటగాడు దూరం

ఇంటర్నెట్ డెస్క్: ఐపీఎల్‌ (IPL) 2024 సీజన్‌ ఆరంభానికి ముందు సన్‌రైజర్స్‌కు షాక్ తగిలింది. ఈ సారి జట్టుకు ఆడే తొలి మూడు మ్యాచ్‌లకు శ్రీలంక లెగ్‌ స్పిన్నర్‌ వానిందు హసరంగ (Wanindu Hasaranga) దూరంకానున్నాడు. జాతీయ జట్టు విధుల కారణంగా అతడు ఐపీఎల్‌-2024 సీజన్‌ కోసం భారత్‌కు ఆలస్యంగా రానున్నాడు. గతేడాది జరిగిన మినీ వేలంలో హసరంగను రూ.1.5 కోట్లకు సన్‌రైజర్స్‌ కొనుగోలు చేసింది. 2023 ఆగస్టులో టెస్టు క్రికెట్‌కు రిటైర్మెంట్‌ ప్రకటించిన అతడు తాజాగా ఆ నిర్ణయాన్ని వెనక్కి తీసుకున్నాడు. దీంతో బంగ్లాదేశ్‌తో మార్చి 22 నుంచి ప్రారంభంకానున్న రెండు టెస్టుల సిరీస్‌కు అతడిని ఎంపిక చేశారు. ఈ సిరీస్‌ ఏప్రిల్ 3న ముగియనుంది. అనంతరం హసరంగ భారత్‌కు చేరుకుని ఎస్‌ఆర్‌హెచ్‌ మిగతా మ్యాచ్‌లకు అందుబాటులో ఉంటాడు. అతడు గత మూడు సీజన్లలో ఆర్సీబీకి ప్రాతినిధ్యం వహించిన సంగతి తెలిసిందే. మొత్తం 26 మ్యాచ్‌లు ఆడి 35 వికెట్లు పడగొట్టాడు.