IND vs WI : ప్రయోగాలకు వేళాయె.. వైట్వాష్పై కన్నేసిన భారత్
తొలి రెండు వన్డేల్లో ఘన విజయం సాధించిన టీమ్ఇండియా మంచి జోష్ మీద ఉంది. మూడో మ్యాచులోనూ అదే ఊపును కొనసాగించి వన్డే సిరీస్ను వైట్ వాష్ చేయాలని చూస్తోంది. మూడు వన్డేల..
ఇంటర్నెట్ డెస్క్ : తొలి రెండు వన్డేల్లో ఘన విజయం సాధించిన టీమ్ఇండియా మంచి జోష్ మీద ఉంది. మూడో మ్యాచులోనూ అదే ఊపును కొనసాగించి వన్డే సిరీస్ను వైట్ వాష్ చేయాలని చూస్తోంది. మూడు వన్డేల సిరీస్లో ఇప్పటికే 2-0 ఆధిక్యంలో కొనసాగుతున్న భారత జట్టు.. శుక్రవారం (ఫిబ్రవరి 11న) జరుగనున్న నామమాత్రపు మూడో వన్డేలో ప్రయోగాలు చేసే అవకాశం ఉంది. పూర్తి స్థాయి వన్డే కెప్టెన్గా బాధ్యతలు చేపట్టాక రోహిత్ శర్మ సాధించిన తొలి సిరీస్ ఇదే. మరో వైపు, పేలవ ప్రదర్శనతో సిరీస్ కోల్పోయిన వెస్టిండీస్ జట్టు మూడో వన్డేలోనైనా పుంజుకుంటుందేమో చూడాలి.!
కరోనా కారణంగా తొలి రెండు వన్డేలకు దూరమైన ఓపెనర్ శిఖర్ ధావన్.. కోలుకుని తిరిగి జట్టులోకి రావడం భారత్కు సానుకూలాంశం. మూడో వన్డేలో కెప్టెన్ రోహిత్ శర్మతో కలిసి అతడు ఓపెనింగ్ చేయనున్నాడు. గత నెలలో దక్షిణాఫ్రికాతో జరిగిన వన్డే సిరీస్లో ధావన్ కీలక ఇన్నింగ్స్లు ఆడాడు. అదే ఫామ్ను వెస్టిండీస్పై కొనసాగించాలని చూస్తున్నాడు. అతడి స్థానంలో తొలి వన్డేలో ఇశాన్ కిషన్, రెండో వన్డేలో రిషభ్ పంత్ ఓపెనర్లుగా బరిలోకి దిగారు. మూడో వన్డేకి శిఖర్ ధావన్ అందుబాటులోకి రావడంతో కేఎల్ రాహుల్ మిడిలార్డర్లోనే బరిలోకి దిగనున్నాడు. విరాట్ కోహ్లీ, రిషభ్ పంత్, సూర్యకుమార్ యాదవ్లతో మిడిలార్డర్ బలంగా కనిపిస్తోంది. గత వన్డేలో స్వల్ప వ్యవధిలోనే కీలక వికెట్లు కోల్పోయి కష్టాల్లో పడిన టీమ్ఇండియాను సూర్యకుమార్ (64) అద్భుత ఇన్నింగ్స్తో ఆదుకున్న విషయం తెలిసిందే. ధావన్ రాకతో యువ ఆల్ రౌండర్ దీపక్ హుడాను పక్కన పెట్టే అవకాశం ఉంది. శ్రేయస్ అయ్యర్ని తుదిజట్టులోకి తీసుకునే విషయంలో స్సష్టత రావాల్సి ఉంది.
* కుర్రాళ్లకు ఓ అవకాశం.!
మూడు వన్డేల సిరీస్లో 2-0 ఆధిక్యంలో కొనసాగుతున్న భారత జట్టు మూడో వన్డేలో ప్రయోగాలు చేయనుంది. గాయం నుంచి కోలుకుని పునరాగమనం కోసం ఎదురు చూస్తున్న లెగ్ స్పిన్నర్ కుల్దీప్ యాదవ్ లేదా యువ ఆటగాడు రవి బిష్ణోయ్లలో ఒకరికి చోటు దక్కొచ్చు. దీంతో యుజ్వేంద్ర చాహల్, వాషింగ్టన్ సుందర్లలో ఒకరికి విశ్రాంతినివ్వనున్నారు. అలాగే, యువ పేసర్ అవేశ్ ఖాన్ భారత జట్టులోకి అరంగేట్రం చేసేందుకు ఎదురు చూస్తున్నాడు. ఒక వేళ అవేశ్ ఖాన్కి అవకాశం ఇస్తే.. మహమ్మద్ సిరాజ్ను పక్కన పెట్టక తప్పదు. ఈ సిరీస్లో అద్భుతమైన ప్రదర్శనతో ఆకట్టుకున్న పేసర్ ప్రసిద్ధ్ కృష్ణ, శార్దూల్ ఠాకూర్లు అలాగే కొనసాగనున్నారు. ఈ సిరీస్లో విండీస్ జట్టును స్వల్ప స్కోర్లకే ఆలౌట్ చేయడంలో భారత బౌలర్లు కీలకంగా వ్యవహరించిన విషయం తెలిసిందే. తొలి వన్లేలో 176, రెండో మ్యాచులో 193 పరుగులకు విండీస్ను ఆలౌట్ చేశారు.
* ఆఖరి మ్యాచులోనైనా విండీస్ రాణిస్తుందా.?
ఇప్పటికే పేలవ ప్రదర్శనతో వన్డే సిరీస్ను కోల్పోయిన వెస్టిండీస్ జట్టు మూడో మ్యాచులోనైనా రాణించి పరువు కాపాడుకోవాలని చూస్తోంది. కెప్టెన్ కీరన్ పొలార్డ్, ఆల్ రౌండర్ జేసన్ హోల్డర్ తమ పాత్రలకు న్యాయం చేయాల్సి ఉంది. వీరితో పాటు షాయ్ హోప్, బ్రెండన్ కింగ్, నికోలస్ పూరన్ అంచనాలకు తగ్గట్టుగా రాణించాల్సిన అవసరం ఉంది. విండీస్ బౌలింగ్ కాస్త మెరుగ్గానే కనిపిస్తోంది. పేసర్లు కీమర్ రోచ్, అల్జారీ జోసెఫ్, ఓడీన్ స్మిత్ సరైన లెంగ్త్లో బంతులేస్తూ వికెట్లు సాధించారు. స్పిన్నర్లు ఫేబియన్ అలెన్, అకీల్ హోసెయిన్ కూడా భారత్ని కట్టడి చేయడంలో తమ వంతు పాత్ర పోషించారు. చివరి వన్డేలోనూ ఇదే ప్రదర్శనను కొనసాగించాలని విండీస్ జట్టు భావిస్తోంది. విండీస్ జట్టు ఆడిన గత 17 వన్డేల్లో.. 50 ఓవర్లలోపే ఆలౌట్ కావడం ఇది 11వ సారి కావటం గమనార్హం.
తుది జట్ల అంచనా :
భారత్ : రోహిత్ శర్మ (కెప్టెన్), శిఖర్ ధావన్, విరాట్ కోహ్లీ, కేఎల్ రాహుల్, రిషభ్ పంత్, సూర్యకుమార్ యాదవ్, శార్దూల్ ఠాకూర్, యుజ్వేంద్ర చాహల్/వాషింగ్టన్ సుందర్, కుల్దీప్ యాదవ్/రవి బిష్ణోయ్, ప్రసిద్ద్ కృష్ణ, మహమ్మద్ సిరాజ్/అవేశ్ ఖాన్
వెస్టిండీస్ : కీరన్ పొలార్డ్ (కెప్టెన్), ఫేబియన్ అలెన్, షమార్ బ్రూక్స్, జేసన్ హోల్డర్, షాయ్ హోప్, అకీల్ హోసెయిన్, అల్జారీ జోసెఫ్, బ్రెండన్ కింగ్, నికోలస్ పూరన్, కీమర్ రోచ్, ఓడీన్ స్మిత్
Trending
గమనిక: ఈనాడు.నెట్లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.
మరిన్ని
-
బెంగళూరు గెలిచిందోచ్..
విధ్వంసక బ్యాటింగ్తో ప్రత్యర్థులను హడలెత్తిస్తున్న సన్రైజర్స్ హైదరాబాద్తో వరుస ఓటములతో సతమతమవుతున్న రాయల్ ఛాలెంజర్స్ బెంగళూరుతో మ్యాచ్ అంటే ఫేవరెట్ ఎవరో చెప్పాల్సిన పని లేదు. -
చదరంగ యువరాజుకు ఘన స్వాగతం
సమయం తెల్లవారుజామున 3 గంటలు. చెన్నై అంతర్జాతీయ విమానాశ్రయం. సాధారణంగా రాత్రి వేళ ప్రయాణికులతో మాత్రమే కాస్త సందడిగా ఉండే ఆ విమానాశ్రయంలో గురువారం మాత్రం ఎంతో హడావుడి నెలకొంది. -
దిల్లీ జట్టులోకి గుల్బాదిన్
గాయంతో ఐపీఎల్ 17వ సీజన్ నుంచి అర్ధంతరంగా తప్పుకొన్న మిచెల్ మార్ష్ స్థానాన్ని అఫ్గానిస్థాన్ పేస్ ఆల్రౌండర్ గుల్బాదిన్ నయీబ్తో దిల్లీ క్యాపిటల్స్ భర్తీ చేసింది. -
ఫైనల్లో ధీరజ్ బృందం
ఆర్చరీ ప్రపంచకప్ స్టేజ్-1 టోర్నీలో భారత పురుషుల రికర్వ్ జట్టు సత్తా చాటింది. -
ఆ నిబంధనతో ప్రమాదమే
ఇంపాక్ట్ ప్లేయర్ నిబంధన వల్ల ఆల్రౌండర్ పాత్ర ప్రమాదంలో పడుతోందని స్పిన్నర్ అక్షర్ పటేల్ అన్నాడు. -
ట్రయల్స్లో అర్జున్ రికార్డు స్కోరు
ఒలింపిక్ షూటింగ్ ట్రయల్స్ 10మీ ఎయిర్ రైఫిల్లో అర్జున్ బబూత ప్రపంచ రికార్డు స్కోరు (254) సాధించాడు. -
భారత అథ్లెట్ల జోరు
ఆసియా అండర్-20 అథ్లెటిక్స్ ఛాంపియన్షిప్స్లో భారత అథ్లెట్ల జోరు కొనసాగుతోంది.