GT vs CSK: గుజరాత్‌ బోణీ.. చెన్నైపై 5 వికెట్ల తేడాతో విజయం

అహ్మదాబాద్‌: డిఫెండింగ్‌ ఛాంపియన్‌ గుజరాత్ టైటాన్స్‌ (Gujarat Titans)కు ఐపీఎల్‌-16 (IPL 16) సీజన్‌లో అదిరే ఆరంభం. చెన్నై సూపర్‌ కింగ్స్‌తో జరిగిన లీగ్‌ ఆరంభ మ్యాచ్‌లో గుజరాత్ 5 వికెట్ల తేడాతో విజయం సాధించింది. తొలుత బ్యాటింగ్‌ చేసిన చెన్నై.. రుతురాజ్‌ గైక్వాడ్ (92) దంచికొట్టడంతో నిర్ణీత 20 ఓవర్లలో 7 వికెట్ల నష్టానికి 178 పరుగులు చేసింది. ఈ లక్ష్యాన్ని హార్దిక్‌ సేన.. 19.2 ఓవర్లలో 5 వికెట్లు కోల్పోయి ఛేదించింది. శుభ్‌మన్‌ గిల్ (63; 36 బంతుల్లో 6 ఫోర్లు, 3 సిక్స్‌లు) కీలక ఇన్నింగ్స్‌ ఆడాడు. వృద్ధీమాన్‌ సాహా (25; 16 బంతుల్లో), ఇంపాక్ట్‌ ప్లేయర్‌గా వచ్చిన సాయి సుదర్శన్‌ (22; 17 బంతుల్లో), విజయ్‌ శంకర్‌ (27; 21 బంతుల్లో), రషీద్‌ ఖాన్‌ (10 ), రాహుల్ తెవాతియా (15 ) పరుగులు చేశారు. చెన్నై బౌలర్లలో రాజ్యవర్ధన్‌ హంగార్గేకర్‌ మూడు, రవీంద్ర జడేజా, తుషార్‌ దేశ్‌పాండే తలో వికెట్ పడగొట్టారు.

తొలుత టాస్‌ ఓడి బ్యాటింగ్‌ చేసిన సీఎస్కే (CSK) నిర్ణీత 20 ఓవర్లలో 7 వికెట్ల నష్టానికి 178 పరుగులు చేసింది. రుతురాజ్‌ గైక్వాడ్ (92; 50 బంతుల్లో 4 ఫోర్లు, 9 సిక్స్‌లు)  త్రుటిలో సెంచరీ మిస్‌ చేసుకున్నాడు. మొయిన్‌ అలీ (23; 17 బంతుల్లో 4 ఫోర్లు, 1 సిక్స్‌), శివమ్‌ దూబె (19), ధోనీ (14), అంబటి రాయుడు (12),  బెన్‌ స్టోక్స్‌ (7) పరుగులు చేశారు.  గుజరాత్‌ బౌలర్లలో రషీద్ ఖాన్‌, అల్జారీ జోసెఫ్‌, షమి తలో రెండు వికెట్లు పడగొట్టగా.. లిటిల్ ఒక్క వికెట్ తీశాడు.