Sanju Samson: శ్రీలంకతో సిరీస్‌కు దూరం కావడంపై సంజు పోస్ట్‌

పుణె:  జట్టులో అవకాశాల విషయంలో సామాజిక మాధ్యమాల్లో సంజు శాంసన్‌(Sanju Samson)కు విపరీతమైన మద్దతు లభించిన విషయం తెలిసిందే. కానీ, లేక లేక వచ్చిన ఒకే ఒక్క అవకాశం కూడా ఈ వికెట్‌ కీపర్‌కు కలిసిరాలేదు. శ్రీలంకతో  సిరీస్‌కు సైతం ఈ ఆటగాడు దూరమయ్యాడు. మంగళవారం జరిగిన తొలి టీ20 మ్యాచ్‌(IND vs SL 2023)లో బౌండరీ వద్ద బంతిని ఆపే క్రమంలో అతడి ఎడమ మోకాలికి గాయమైంది. దీంతో అతడి స్థానంలో జితేశ్‌ శర్మను సెలక్షన్‌ కమిటీ ప్రకటించింది. ఈ సిరీస్‌ నుంచి వైదొలిగిన నేపథ్యంలో సంజు తన ఇన్‌స్టాగ్రామ్‌ వేదికగా ఓ పోస్టును పంచుకున్నాడు. 

మైదానంలోని స్టాండ్స్‌ వైపు చూస్తున్న ఫొటోను పోస్ట్‌ చేస్తూ ‘ఆల్‌ ఈజ్‌ వెల్‌.. త్వరలోనే తిరిగొస్తాను’ అంటూ క్యాప్షన్‌ ఇచ్చాడు. నిజానికి ఈ సిరీస్‌ సంజుకి చాలా కీలకమైంది. ఇందులో నిరూపించుకుంటే టీ20లో సుస్థిర స్థానం లభించే అవకాశాలు ఉండేవి. కానీ, తొలి మ్యాచ్‌లో కేవలం 5 పరుగులే చేయడం, గాయంతో వెనుదిరగడం అతడికి చేదు అనుభవాన్ని మిగిల్చింది.  

సంజు గాయంపై బీసీసీఐ(BCCI) ఇటీవల స్పందించింది. బుధవారం అతడి కాలిని స్కానింగ్‌ తీశారు. మరో 20 రోజుల పాటు సంజుకి విశ్రాంతి ఇవ్వనున్నట్టుగా తెలిపింది. సంజు ఈ సిరీస్‌ నుంచి వైదొలగడం.. ఎప్పటి నుంచో ఎదురుచూస్తున్న రాహుల్‌ త్రిపాఠికి అవకాశం అందించింది. రెండో టీ20లో అరంగేట్రం చేసిన రాహుల్ నంబర్‌ 3 స్థానంలో బ్యాటింగ్‌కి దిగి 5 పరుగులు మాత్రమే చేయగలిగాడు. ఇక ఈ మ్యాచ్‌లో 16 పరుగుల తేడాతో గెలిచిన శ్రీలంక.. సిరీస్‌ను 1-1తో సమం చేసింది. ఇరు జట్ల మధ్య కీలక మ్యాచ్‌ రాజ్‌కోట్‌ వేదికగా శనివారం జరగనుంది.