మార్పును ఆహ్వానిస్తూనే గ్రామాల పునాదులు కాపాడుకోవాలి

‘ఊరుగాని ఊరు’ పుస్తకావిష్కరణలో మంత్రి నిరంజన్‌రెడ్డి

ఈనాడు, హైదరాబాద్‌: నవీనతను ఆహ్వానిస్తూనే గ్రామాల పునాదులను కాపాడుకోవాలని రాష్ట్ర మంత్రి నిరంజన్‌రెడ్డి సూచించారు. పుట్టుక, జీవన విధానాలు ధ్వంసం చేయకుండా మార్పును ఆహ్వానించాలన్నారు. కోట్ల వనజాత రచించిన ‘ఊరుగాని ఊరు’ నవలను మంత్రి మంగళవారం హైదరాబాద్‌లోని తన నివాసంలో ఆవిష్కరించారు. అనంతరం ఆయన మాట్లాడుతూ.. ఛిద్రమైన గ్రామీణ జీవనంపై నవలలో వర్ణించిన తీరు హృద్యంగా ఉందన్నారు. రచయితలు తమ రచనల ద్వారా గ్రామాలు కోల్పోయిన విలువలు, సంబంధాలు, ఐక్యతను గుర్తు చేసి విలువల పునరుద్ధరణ కోసం కృషి చేయాలన్నారు. రాష్ట్రంలో మారిన గ్రామాల పరిస్థితిపై మరిన్ని రచనలు రావాలని రాష్ట్ర సాహిత్య అకాడమీ ఛైర్మన్‌ గౌరీశంకర్‌ ఆకాంక్షించారు. రచయిత్రి, ఎమ్మెల్యే శంకర్‌ నాయక్‌ పాల్గొన్నారు.