ఐదేళ్లలో రామప్ప ఆలయానికి రూ.4.93 కోట్ల ఖర్చు

ఈనాడు, దిల్లీ: తెలంగాణలోని ప్రఖ్యాత రామప్ప ఆలయ నిర్వహణకు గత అయిదేళ్లలో రూ.4.93 కోట్లు ఖర్చు చేసినట్లు కేంద్ర పర్యాటకశాఖ మంత్రి జి.కిషన్‌రెడ్డి చెప్పారు. ఇందులో 2018-19 నుంచి 2021-22 వరకు రూ.2.30 కోట్లు వెచ్చించగా, 2022-23లో రూ.2.63 కోట్లు ఖర్చు చేసినట్లు వెల్లడించారు. రాజ్యసభలో గురువారం భాజపా సభ్యుడు కె.లక్ష్మణ్‌ అడిగిన ప్రశ్నకు మంత్రి బదులిచ్చారు.

49% సామర్థ్యంతోనే నడుస్తున్న ఏపీ విమానాశ్రయాలు

ఏపీలోని విమానాశ్రయాలు 48.95% ప్రయాణికుల సామర్థ్యంతోనే నడుస్తున్నాయి. రాష్ట్రంలోని మొత్తం ఎయిర్‌పోర్టుల వార్షిక గరిష్ఠ ప్రయాణికుల సామర్థ్యం 10.07 మిలియన్లు కాగా, 2022-23లో 4.93 మిలియన్ల మంది ఇక్కడి నుంచి రాకపోకలు సాగించారు. తెలంగాణలోని ఎయిర్‌పోర్టుల గరిష్ఠ వార్షిక సామర్థ్యం 21.6 మిలియన్లు కాగా, 2022-23లో 21 మిలియన్ల (97.22%) మంది ప్రయాణించారు. గురువారం లోక్‌సభలో ఓప్రశ్నకు సమాధానంగా కేంద్ర పౌరవిమానయాన శాఖ సహాయమంత్రి జనరల్‌ వీకే సింగ్‌ ఈ వివరాలను వెల్లడించారు.