Breaking | Feedback | ePratibha | E-PAPER | Pratibha

సారీతోనే సరిపోదు!

జీవిత భాగస్వామిని బాధపెట్టాక కొందరు సారీ చెప్పి, బాధ్యత తీరిపోయిందనుకుంటారు. ఎదుటివారి మనసులో బాధ తగ్గిందో లేదో కూడా గుర్తించరు. ఇలాంటి మొక్కుబడి క్షమాపణలు దంపతుల మధ్య దూరాన్నే పెంచుతాయి తప్ప తగ్గించవు.

Published : 28 Nov 2021 01:29 IST

బాధపెట్టి సరైన రీతిలో క్షమించమని అడగకపోతే అవతలివారు నిరుత్సాహపడతారు. వారి వేదన మరింత పెరగొచ్చు. మీ విచారాన్ని మృదువైన మాటల్లో వ్యక్తం చేయగలగాలి. అయినా వారిలో మార్పు కనిపించకపోయినా... కోపాన్ని ప్రదర్శించకూడదు. మీ సంజాయిషీ వినగానే వారి మనసులోని బాధ ఆవిరిలా మాయమవ్వాలని లేదు కదా! వారి కోపం తగ్గించడానికి ఓపికగా ప్రయత్నించాలి.

* బాధ్యతను అంగీకరించడం.. కొందరు కోపంలో భాగస్వామిని కించపరుస్తారు. లేదా మాటలతో బాధపెడతారు. కోపం తగ్గాక కానీ నోరు జారిన విషయం అర్థమవదు. తీరా ఒప్పుకోవడానికేమో మనసు అంగీకరించదు. ఈ తరహా అహం బంధానికి మంచిది కాదు. తప్పు అనిపిస్తే ఒప్పుకోవాలి. పూర్తిబాధ్యతనూ తీసుకోవాలి. మరోసారి ఇలా జరగదంటూ భరోసా ఇవ్వాలి. ఇలాంటి ప్రవర్తన ఎదుటివారిలో క్రమేపీ మార్పును తీసుకొస్తుంది. అవతలి వారి మనసును గెలవడానికి పశ్చాత్తాపాన్ని ప్రదర్శించడమే కాదు, ఏర్పడిన దూరాన్నీ తగ్గించుకునే ప్రయత్నమూ నిజాయతీగా చేయాలి.

* అభ్యర్థించడంలో... క్షమాపణలో పారదర్శకత కనిపించాలి. అలాకాకుండా కాసేపు ఒంటరిగా ఉంటే చాలు.. కోపం అదే పోతుంది అని ఆలోచించొద్దు. తన భావోద్వేగాలపై పట్టింపు లేదనో, నిర్లక్ష్యమనో భావించే ప్రమాదం ఉంది. కాస్త ఓపికగా జరిగిన దాని గురించి ప్రశాంతంగా చర్చించుకుంటే చాలు. ఇరువురి మనసులూ తేలికవుతాయి.

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.