Published : 10/10/2022 00:30 IST

అంతరిక్షంలో అతివలు..

అక్టోబరు 4 - 10 అంతరిక్ష వారోత్సవం

ఆకాశాన్నీ దాటి అంతరిక్షంలోకి నేటివరకు 75 మంది మహిళా వ్యోమగాములు అడుగుపెట్టారు. మొత్తం వ్యోమగాముల్లో ఇది 12 శాతం. వీరిలో కొందరు స్పేస్‌వాక్‌ చేయగా.. ఇంకొందరు పలు ప్రతిష్ఠాత్మకమైన పరిశోధక ప్రాజెక్టుల్లో భాగమయ్యారు. వందల రోజులు అంతరిక్ష కేంద్రంలో బాధ్యతలు నిర్వహించి తమ మాతృదేశాలకు గర్వకారణమయ్యారు.

అంతరిక్షయాత్ర చేసిన మహిళల్లో అమెరికాకు చెందినవారే అత్యధికం. తర్వాత స్థానం రష్యాది. ఆ దేశం నుంచి అయిదుగురు వెళ్లగా, చైనా, కెనడా, జపాన్‌ నుంచి ఇద్దరిద్దరు.. ఫ్రాన్స్‌, ఇటలీ, దక్షిణ కొరియా, యుకె నుంచి ఒక్కొక్కరున్నారు. కల్పనాచావ్లా, సునీతా విలియమ్స్‌, శిరీష బండ్ల.. అంతరిక్షంలోకి వెళ్లిన భారత సంతతి మహిళలు.

పరిశోధనలు.. ప్రయోగాలు..
అంతర్జాతీయ అంతరిక్షకేంద్రంలో పలు ప్రయోగాలు చేపట్టి తమ ప్రత్యేకతను చాటిన మహిళలూ కొందరున్నారు. వారిలో కెలా బరాన్‌ ఒకరు. ఈమె పత్తి కణజాలాల నుంచి మొక్కల్ని పెంచి చూపిస్తే, నాసా వ్యోమగామి మెగాన్‌ మెక్‌ ఆర్థర్‌ గుండె కండరాల పనితీరు, తగిన చికిత్స వంటివాటిపై పలు ప్రయోగాలు చేసింది. జెస్సికా మెయిర్‌ అంతరిక్షంలో తాజా ఆహారాన్ని తయారుచేసుకోవడం, ఆకుకూరలను పెంచడంలో కాంతి, ఎరువుల ప్రభావంపై ప్రయోగాలు చేపట్టి నిరూపించింది. ఇలా మరెందరో తమ ప్రయోగాలతో కొత్త మార్గాలు చూపించారు.

అంతరిక్షంలో స్పేస్‌వాక్‌ చేసిన మొదటి మహిళగా స్వెత్లానా సవిత్స్‌కయా కాగా, అత్యధికంగా   8.56 గంటలు స్పేస్‌వాక్‌ చేసిన మహిళ సూసన్‌ హెల్మ్‌. తొలి మహిళా ఐఎస్‌ఎస్‌ కమాండర్‌గా నాసా వ్యోమగామి పెగ్గీ విట్సన్‌ 2008లో ఆరు నెలలపాటు విధులు నిర్వహించింది. 2010లో నలుగురు మహిళా వ్యోమగాములు ఒకేసారి అంతరిక్షయాత్రలో పాల్గొని చరిత్ర సృష్టించారు. స్పేస్‌స్టేషన్‌ నుంచి లైవ్‌లో పాల్గొన్న తొలి మహిళ అన్నెమెక్‌లైన్‌, స్పేస్‌వాక్‌ను పూర్తిచేసిన తొలి మహిళా బృంద సభ్యులు జెస్సికా మెయిర్‌, క్రిస్టినా కోచ్‌.. ఇలాంటి వారెందరో రేపటితరానికి స్ఫూర్తి.


గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని

ఆ ప్రమాదం.. వ్యాపారవేత్తను చేసింది

సినిమా, కాలక్షేపం, స్నేహితులతో ముచ్చట్లు.. సందర్భం ఏదైనా మనకు చిరుతిళ్లు ఉండాల్సిందే! వాటిని నిల్వ ఉంచడానికి వాడే రసాయనాలు, చక్కెరలు, రిఫైన్డ్‌ ఆయిల్స్‌.. అన్నీ అనారోగ్యకరమైనవే! చదువుతున్నప్పుడు కంటే స్వీయ అనుభవంతో ఈ విషయం మరింత అవగాహనకు వచ్చింది అపూర్వ గురురాజ్‌కు. దీంతో ఆరోగ్యకరమైన చిరుతిళ్లను ఉత్పత్తి చేస్తూ.. విదేశాలకూ ఎగుమతి చేసే స్థాయికి ఎదిగారు. ఆమెను వసుంధర పలకరించగా తన గురించి చెప్పుకొచ్చారిలా.. మాది బెంగళూరు. ఆరేళ్లన్నప్పుడు అమ్మను కోల్పోయా. సివిల్‌ ఇంజినీర్‌ అయిన నాన్న వ్యాపారవేత్త కూడా. నాకేమో ఫోరెన్సిక్‌ శాస్త్రవేత్త కావాలని.. నాన్నేమో ఇంజినీరింగ్‌ చేయాలని.. రెండూ కాక కెమిస్ట్రీ, జువాలజీ, న్యూట్రిషన్‌లున్న ట్రిపుల్‌ మేజర్‌ కోర్సును ఎంచుకున్నా. అది చదివేప్పుడే ఎంటీఆర్‌, పెప్సీ సంస్థల్లో ఇంటర్న్‌గా ఉత్పత్తుల్లో పోషకాల ప్రమాణాల గురించి తెలుసుకున్నా. భారతీయ ఆహారశైలిలో పోషకాలకే ప్రాధాన్యం. కానీ మనకు లభ్యమయ్యే ప్యాకేజ్డ్‌ ఆహారంలో 90శాతం పాశ్చాత్యుల జీవనశైలికి అనువైనవే. పైగా వీటి నిల్వకు వాడే రసాయనాలు ఆరోగ్యానికి చేటని ఫీల్డ్‌వర్క్‌లో గుర్తించా. ఆసక్తికర విషయమేమిటంటే మన ధాన్యాలను ఎగుమతి చేసుకొని మనకే ఇలా అమ్ముతుండటం! అపోలో ఆస్పత్రిలో ఆంకాలజీ న్యూట్రిషన్‌ విభాగంలో కొన్నాళ్లు పనిచేసినపుడు వీటిపై మరింత స్పష్టత వచ్చింది.

తరువాయి