Published : 24/01/2023 00:55 IST

నీటి కోసం.. ప్రపంచమంతా చుట్టేస్తోంది

భవిష్యత్తులో ప్రపంచం ఎదుర్కోబోయే గడ్డు సమస్య నీటికొరత. ఉపేక్షిస్తూ కూర్చుంటే పచ్చని మన నేలలూ.. ఎడారి భూములవుతాయి. కానీ ఈ సమస్యని పట్టించుకునే వాళ్లెవరు? ప్రజల దృష్టిని నీటి    కొరతవైపు మళ్లించాలన్న లక్ష్యంతో మినాగులి 200 మారథాన్ల లక్ష్యంతో ప్రపంచాన్ని చుట్టేస్తోంది..

‘అడవులని బతికించుకోవడం కోసం మాట్లాడే మనం... నీటి గురించి ఎందుకు మాట్లాడం? సమయం గడిచేకొద్దీ ఉన్న కాస్త నీరూ ఆవిరైపోతోంది. నీళ్లు లేకపోతే అడవులూ లేవు. భవిష్యత్తులో ప్రజలు ఆకలితో కాదు... దాహంతో అల్లాడిపోతారు. ఈ నీటిని కాపాడుకోవాల్సిన బాధ్యత ప్రజలదీ, కార్పొరేట్‌ సంస్థలది కూడా. అందుకే ప్రపంచంలోని ఎడారులూ, నీటికొరత ఎక్కువగా ఉన్న ప్రాంతాలే లక్ష్యంగా పరుగుపెడుతున్నా. అలా అయినా అందరి దృష్టి ఈ సమస్యపై పడుతుందన్నదే నా ఆశ’ అంటోంది మెల్‌బోర్న్‌లో న్యాయవాదిగా కెరియర్‌ ప్రారంభించిన మినాగులి. స్వచ్ఛమైన జలాలని కాపాడుకొనే ఉద్దేశంతో ‘థస్ట్‌’ అనే స్వచ్ఛంద సంస్థని స్థాపించి.. ఇంతవరకూ తీవ్రమైన నీటికొరతని ఎదుర్కొంటున్న 17 దేశాలని తన మారథాన్లతో చుట్టేశారామె. ‘ఇప్పటికి 17 దేశాలే. త్వరలోనే మరో 40 దేశాలు నీటి ఎద్దడి బారిన పడి, ఎడారులవ్వడానికి సిద్ధంగా ఉన్నాయి. కొన్నిదేశాల్లో మంచినీటిని అందించే కుళాయిలు, పైపులైన్లు కూడా లేవు. దాంతో కలుషిత నీటిని తాగి, ప్రతి రోజూ ఐదేళ్లలోపున్న 800 మంది చిన్నారులు డయేరియా బారిన పడి మరణిస్తున్నారు. మనకున్న నీటిలో అధికశాతం కార్పొరేట్‌ కంపెనీలు తమ అవసరాల కోసం వాడుకుంటున్నాయి. ఈ సమస్యకు పరిష్కారం కూడా వాళ్ల నుంచే రావాల’నే మినా ఇంతవరకూ ఆస్ట్రేలియా, ఆఫ్రికా, ఆసియా దేశాల్లో 155 మారథాన్లని పూర్తిచేశారు. ఐక్యరాజ్యసమితి ఆధ్వర్యంలో న్యూయార్క్‌లో ఈ ఏడాది జరిగే ప్రపంచ నీటి సదస్సు మొదలయ్యేనాటికి తక్కిన మారథాన్‌లని పూర్తిచేసి అల్ట్రామారథాన్‌ రన్నర్‌గా మారాలన్నది మినా లక్ష్యం. ‘ఇంతవరకూ ఎనిమిది వేల కిలోమీటర్ల దూరం పరుగుపెట్టా. అలాగని నేనో గొప్ప ఫిట్‌నెస్‌ ఫ్రీక్‌ని అనుకొనేరు. చిన్నప్పుడు స్కూల్లో నన్నెవరూ తమ టీమ్‌లోకి తీసుకొనేవారు కాదు. అంత బలహీనంగా ఉండేదాన్ని. మారథాన్‌ మధ్యలో కండరాలు దెబ్బతిన్నాయి. అనారోగ్యం పాలయ్యా. అయినా పరుగాపలేదు. 53 ఏళ్ల వయసులో ఇలా అలుపెరగకుండా పరుగుపెట్టడానికి కారణం నీళ్లే. తక్కిన మారథాన్‌లనీ పూర్తిచేయాలన్నదే నా లక్ష్యం. నేనే కాదు.. ఈ బ్లూరన్‌ ఛాలెంజ్‌లో మీరూ పాల్గొనవచ్చు. ప్రాణాధారమైన నీటిని కాపాడుకోవచ్చు’అంటారు మినా.


Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని

ఆ ప్రమాదం.. వ్యాపారవేత్తను చేసింది

సినిమా, కాలక్షేపం, స్నేహితులతో ముచ్చట్లు.. సందర్భం ఏదైనా మనకు చిరుతిళ్లు ఉండాల్సిందే! వాటిని నిల్వ ఉంచడానికి వాడే రసాయనాలు, చక్కెరలు, రిఫైన్డ్‌ ఆయిల్స్‌.. అన్నీ అనారోగ్యకరమైనవే! చదువుతున్నప్పుడు కంటే స్వీయ అనుభవంతో ఈ విషయం మరింత అవగాహనకు వచ్చింది అపూర్వ గురురాజ్‌కు. దీంతో ఆరోగ్యకరమైన చిరుతిళ్లను ఉత్పత్తి చేస్తూ.. విదేశాలకూ ఎగుమతి చేసే స్థాయికి ఎదిగారు. ఆమెను వసుంధర పలకరించగా తన గురించి చెప్పుకొచ్చారిలా.. మాది బెంగళూరు. ఆరేళ్లన్నప్పుడు అమ్మను కోల్పోయా. సివిల్‌ ఇంజినీర్‌ అయిన నాన్న వ్యాపారవేత్త కూడా. నాకేమో ఫోరెన్సిక్‌ శాస్త్రవేత్త కావాలని.. నాన్నేమో ఇంజినీరింగ్‌ చేయాలని.. రెండూ కాక కెమిస్ట్రీ, జువాలజీ, న్యూట్రిషన్‌లున్న ట్రిపుల్‌ మేజర్‌ కోర్సును ఎంచుకున్నా. అది చదివేప్పుడే ఎంటీఆర్‌, పెప్సీ సంస్థల్లో ఇంటర్న్‌గా ఉత్పత్తుల్లో పోషకాల ప్రమాణాల గురించి తెలుసుకున్నా. భారతీయ ఆహారశైలిలో పోషకాలకే ప్రాధాన్యం. కానీ మనకు లభ్యమయ్యే ప్యాకేజ్డ్‌ ఆహారంలో 90శాతం పాశ్చాత్యుల జీవనశైలికి అనువైనవే. పైగా వీటి నిల్వకు వాడే రసాయనాలు ఆరోగ్యానికి చేటని ఫీల్డ్‌వర్క్‌లో గుర్తించా. ఆసక్తికర విషయమేమిటంటే మన ధాన్యాలను ఎగుమతి చేసుకొని మనకే ఇలా అమ్ముతుండటం! అపోలో ఆస్పత్రిలో ఆంకాలజీ న్యూట్రిషన్‌ విభాగంలో కొన్నాళ్లు పనిచేసినపుడు వీటిపై మరింత స్పష్టత వచ్చింది.

తరువాయి