Rishi Sunak: నెగెటివ్‌లోకి సునాక్‌ ఆమోద రేటింగ్‌.. పీఎం పదవి చేపట్టిన తర్వాత మొదటిసారి

లండన్‌: గత ఏడాది చివర్లో బ్రిటన్ ప్రధానిగా నియమితులైన రిషి సునాక్‌(UK PM Rishi Sunak)కు ఆదరణ తగ్గుతున్నట్లు కనిపిస్తోంది. ఆ పదవి చేపట్టిన తర్వాత నుంచి మొదటిసారి ఆయన నెగెటివ్‌ అప్రూవల్ రేటింగ్‌ను పొందడం గమనార్హం. తాజాగా కన్జర్వేటివ్ హోంపోల్‌లో ఈ విషయం వెల్లడైంది. ఈ నెలవారీ సర్వే ప్రకారం..

గత నెల సునాక్‌(Rishi Sunak) రేటింగ్ 11.7 శాతంగా ఉండగా.. అది ఇప్పుడు -2.7కు పడిపోయింది. ప్రధాని పదవి స్వీకరించిన సమయంలో ఆయన ఆమోద రేటు 49.9 శాతంగా ఉంది. ఆ తర్వాత మొదటిసారి ఇప్పుడే నెగెటివ్‌లోకి వెళ్లిపోయారు. శరణార్థులను రువాండాకు పంపే ప్రణాళికకు కోర్టులో ఎదురుదెబ్బ తగలడం, అలాగే వడ్డీ రేట్లను ఐదు శాతం పెంచాలన్న ఇంగ్లండ్ బ్యాంక్‌ నిర్ణయం కూడా ఇందుకు కారణంగా కనిపిస్తోంది. అయితే సునాక్‌కు ఊరటనిచ్చే విషయం ఏంటంటే.. రేటింగ్ పరంగా మాజీ ప్రధానులు బోరిస్‌ జాన్సన్, థెరిసా మే కంటే మెరుగ్గా ఉన్నారు. ఒక దశలో జాన్సన్ రేటింగ్‌ -33.8కి తగ్గగా, థెరిసా మే రేటింగ్‌ -51.2కి పడిపోయింది.

సునాక్‌తో పాటు మరో ఎనిమిది మంది కేబినెట్‌ సహచరులకు నెగెటివ్‌ రేటింగే వచ్చింది. అయితే రక్షణ శాఖ మంత్రి బెన్‌ వాల్లెస్‌కు అత్యధిక ఆమోద రేటింగ్ లభించింది. అది 77.1 శాతంగా ఉంది. విదేశాంగ మంత్రి జేమ్స్‌ క్లెవర్లీ(54.4), హోం మంత్రి సుయెల్లా బ్రేవర్మన్‌(30.4) రేటింగ్ సునాక్‌ కంటే ఎంతో మెరుగ్గా ఉన్నారు. బ్రిటన్‌కు అక్రమంగా వలస వచ్చేవారిని ఆఫ్రికా దేశమైన రువాండాకు తరలించడం తన కల అని, వీసా కాలపరిమితి మించి బ్రిటన్‌లో ఉంటున్న వారిలో భారతీయులే అత్యధికులని పేర్కొంటూ వివాదాస్పద వ్యాఖ్యలు చేసే సుయెల్లా రేటింగ్ పరంగా సునాక్‌ కంటే ఎంతో ముందు ఉండటం గమనార్హం.