కోవిడ్‌ను గెలిచిన సిస్టార్‌!

విజేత కథ

‘సిస్టర్‌.. జాగ్రత్త!’ అన్నారెవరో!
ఫర్వాలేదులే అన్నట్టుగా చిన్నగా నవ్విందామె!
కొన్నాళ్లకు..
‘సిస్టర్‌.. జాగ్రత్త!’ అన్నారింకెవరో!!
‘నా ధర్మం నేను నిర్వర్తించాలి. భయపడితే ఎలా?’ అని సమాధానమిచ్చింది.
ఇంకొన్నాళ్లకు..
‘సిస్టర్‌.. జాగ్రత్త!’ అంటూ ఆ రాష్ట్ర మంత్రి ఫోన్‌ చేశారు.
‘ధన్యవాదాలు..’ అని చెప్పి కొత్త శక్తితో మళ్లీ విధుల్లో చేరింది. ఈ మూడు సంఘటనలు ఆమె శక్తిని తెలియజేసేవే!
కరోనా బాధితులకు సేవలు చేసి.. తానూ వైరస్‌ బారిన పడి.. కొవిడ్‌పై గెలిచి మళ్లీ విధులకు
హాజరవుతున్నారు కేరళ నర్సు రేష్మా మోహన్‌దాస్‌. ఆమెను వసుంధర పలకరించింది.. ఈ నర్సమ్మ అనుభవాలు ఆమె మాటల్లోనే..

కేరళలోకి కరోనా అడుగుపెట్టిన రోజులు. నేను పనిచేస్తున్న కొట్టాయం ప్రభుత్వ మెడికల్‌ కాలేజీ ఆసుపత్రిలో మార్చి తొమ్మిదిన ఓ కొవిడ్‌ బాధితుడిని ఐసోలేషన్‌ వార్డులో ఉంచారు. ఇది మా ఆసుపత్రిలో తొలి కేసు. మర్నాడు మరో ఇద్దరు చేరారు. ఎమర్జెన్సీ వార్డులో పనిచేసిన అనుభవం నాది. రెండు రోజుల తర్వాత నన్ను ఐసోలేషన్‌ వార్డులో విధులు నిర్వర్తించమన్నారు వైద్యులు. పీపీఈ కిట్‌ వేసుకుని, చేతికి తొడుగులతో వార్డులోకి అడుగుపెట్టా. అక్కడున్న రోగుల్లో 88 ఏళ్ల మరియమ్మ, ఆమె భర్త 93 ఏళ్ల థామస్‌ ఉన్నారు. కరోనా భయంతో వణుకుతున్న ఆ దంపతుల సంరక్షణ నా బాధ్యతగా భావించా.
పదకొండు రోజులు..
మరియమ్మ మనుమలు ఇటలీ నుంచి వచ్చారట. కొన్ని రోజులకు ఆ ముగ్గురికీ కొవిడ్‌ పాజిటివ్‌గా తేలింది. వారి ద్వారా ఈ వృద్ధ దంపతులకూ వైరస్‌ సోకింది. ఇద్దరూ పండుటాకులు. వారి పని వారు చేసుకోలేని దుస్థితిలో ఉన్నారు. మరియమ్మకు చెవులు వినిపించవు. థామస్‌ కాళ్లూ, చేతులూ కూడా కదపలేకపోయేవారు. వారిని కన్నబిడ్డలా చూసుకోవాలని నిర్ణయించుకున్నా. మందులు ఇవ్వడమే కాదు.. ఆహారం తినిపించడం నుంచి అన్నీ చేసేదాన్ని. ‘మరీ సన్నిహితంగా మెలుగుతున్నావ్‌! కాస్త జాగ్రత్త!’ అనేవారు అందరూ! ఆ దంపతులకు నా అవసరం అలాంటిది. అంటీముట్టనట్టు ఎలా ఉండగలను. పైగా.. ఆ ఇద్దరూ మాస్కు ధరిస్తే గాలి ఆడటం లేదని బాధపడేవారు. శ్వాస తీసుకోవడంలో ఇబ్బంది అవుతోందని మాస్కు తీసేస్తుండేవారు. నచ్చజెబుతూనే నేను చేయాల్సిన పనులన్నీ చేసేదాన్ని. అలా పదకొండు రోజులు గడిచాయి.
అదే వార్డులో రోగిగా..
మార్చి 23, విధులు ముగించుకున్నా. ఆ రాత్రి ఒంట్లో నలతగా అనిపించింది. తలనొప్పి, జలుబుతోపాటు దగ్గు, జ్వరం మొదలయ్యాయి. నాకూ పరీక్ష చేశారు. కరోనా పాజిటివ్‌గా తేలింది. నేను విధులు నిర్వర్తించిన వార్డులోనే ఐసోలేషన్‌లో ఉంచారు. ఆసుపత్రిలోనే ఉండటం, భౌతిక దూరం పాటించడంతో నా వల్ల ఎవరికేం ఇబ్బందీ కలగలేదు. రోగులకు సాయం చేయాల్సిన నేను.. రోగిలా పడి ఉన్నా. ఎప్పుడు కోలుకుంటానా.. ఎప్పుడెప్పుడు విధుల్లో చేరి రోగులకు సేవలందిస్తానా.. అనిపించేది. పది రోజులకు కోలుకున్నా.
అసలైన ఆనందం..
ఏప్రిల్‌ 3న డిశ్చార్జి చేశారు. మరియమ్మ, థామస్‌ దంపతులు కూడా అదే రోజు డిశ్చార్జి అయ్యారు. నేను చికిత్స పొందుతున్నప్పుడు, కోలుకున్న తరువాత కేరళ రాష్ట్ర ఆరోగ్య, సామాజిక సంక్షేమ శాఖా మంత్రి కేకే శైలజ ఫోన్‌ చేశారు. ‘రేష్మా జాగ్రత్త!’ అన్నారు. రెండు వారాలు ఇంటి దగ్గరే క్వారంటైన్‌లో ఉన్నా. ఏప్రిల్‌ 22న మళ్లీ విధుల్లో చేరా. ‘నువ్వు ఐసోలేషన్‌ వార్డులో వద్దులే!’ అన్నారు వైద్యులు. అక్కడే ఉంటానన్నా. నేను మళ్లీ విధుల్లో చేరానని తెలిసి మంత్రి శైలజ నుంచి సచివాలయానికి రావాల్సిందిగా పిలుపొచ్చింది. ‘నీ సేవ, ధైర్యానికి అభినందనలు. నువ్వు ఎందరికో స్ఫూర్తి’ అని ప్రశంసిస్తూ గులాబీలు చేతికిచ్చారు. అదే రోజు ప్రపంచ నర్సుల దినోత్సవం. సినీహీరో మోహన్‌లాల్‌ కూడా ఫోన్‌ చేశారు. ప్రముఖుల ప్రశంసలు ఒకవైపు.. మా ఆసుపత్రి నుంచి 30 మంది రోగులు పూర్తిగా కోలుకుని ఇంటికి వెళ్లారన్న సంతోషం మరోవైపు.. నాలో మరింత ఉత్సాహం నింపాయి.

రోగులకు సాయం చేయాల్సిన నేను.. రోగిలా ఉండటం నచ్చలేదు. తిరిగి విధుల్లోకి చేరాలన్న నా సంకల్ప శక్తి గొప్పతనం ముందు కరోనా ఓడిపోయింది.

నాన్న మాటలు..

మా నాన్న తిరువనంతపురంలో ఫొటోగ్రాఫర్‌. అమ్మ గృహిణి. అడిగినవారికి తోచిన సాయం చేయాలని చెబుతుండేవారు నాన్న. నన్ను నర్సింగ్‌ చదవమన్నారు. ఇంటర్‌ పూర్తయ్యాక నర్సింగ్‌ చేశా. మూడేళ్ల కిందట కొట్టాయంలో స్టాఫ్‌నర్స్‌గా ఉద్యోగ ప్రస్థానం మొదలుపెట్టా. విధుల్లో ఉన్నప్పుడు నాన్న మాటలే గుర్తొస్తుంటాయి.

Tags :