ఆ పని చేస్తే పెళ్లి కాదన్నారు!

‘బాగా ఆలోచించుకునే వచ్చావా ఈ ఉద్యోగానికి? ఎండా... వానా అని చూడకుండా పని చేయాలి. ఎండలో మాడిపోతావ్‌. పెళ్లికూడా కాదు’... అన్నారా రైల్వే అధికారి. నా రంగు మాత్రమే చూసి వచ్చే పెళ్లికొడుకు నాకు అవసరం లేదు సర్‌... నన్ను నేను నిరూపించుకోవాలని వచ్చా’ అంది కాశిష్‌ శర్మ. రైల్వే అధికారికి ఆ సమాధానం బాగా నచ్చింది.. ఫలితంగా కాశిష్‌శర్మ దేశంలోనే రైల్వేలో తొలి మహిళా ఇన్‌స్పెక్షన్‌ ఇంజినీర్‌గా రికార్డుల్లోకి ఎక్కింది...
చిన్నప్పుడు అమ్మానాన్నలతో కలిసి రైలులో వెళ్తున్నప్పుడు... తనతోపాటే వస్తున్నట్లనిపించే రైలుపట్టాలని చాలా అబ్బురంగా చూసేది కాశిష్‌. రంగుల సిగ్నల్‌లైట్లను చూస్తే మరీ సంబరం. కళ్లప్పగించి చూసేది. పెద్దవుతున్నకొద్దీ ఆ సంతోషం కాస్తా ఆమెలో ఆసక్తిగా మారింది. పుణెలోని సావిత్రి బాయ్‌పూలే విశ్వవిద్యాలయంలో ఎలక్ట్రానిక్స్‌ అండ్‌ టెలీకమ్యూనికేషన్స్‌లో ఇంజినీరింగ్‌ పూర్తిచేసిన కాశిష్‌శర్మ ఆ తరువాత రైల్వే పరీక్షలు రాసి ... ఇన్‌స్పెక్షన్‌ ఇంజినీర్‌గా బాధ్యతలను తీసుకుంది. అలా దేశంలోనే తొలి మహిళా ఇన్‌స్పెక్షన్‌ ఇంజినీర్‌గా నిలిచింది.
ఈ పని చేయలేవన్నారు...
ఇన్‌స్పెక్షన్‌ ఇంజినీర్‌.. అంత తేలికైన ఉద్యోగమేమీ కాదు. రైల్వే ట్రాక్‌ ఏర్పాట్లని పర్యవేక్షించడం, సిగ్నల్స్‌ని ఏర్పాటు చేయడం, రైలు వెళ్తున్నప్పుడు సాంకేతికపరమైన ఇబ్బందులు తలెత్తకుండా చూడటం, బ్రిడ్జ్‌ నిర్మాణంలో కార్మికుల పనితీరుని పర్యవేక్షించడం, రైల్వే పరికరాల పరిశ్రమలను పర్యవేక్షించడం వంటివన్నీ చూసుకోవాల్సి ఉంటుంది. ఎక్కువగా మగవాళ్లతోనే కలిసి పనిచేయాలి. కొన్ని ప్రాంతాల్లో అయితే టాయిలెట్లు కూడా అందుబాటులో ఉండవు. ఉదయం ఏడు గంటలకు మొదలయ్యే పని కొన్ని సందర్భాల్లో రాత్రికి కూడా పూర్తవదు. కానీ వాటన్నింటినీ సమర్థంగా నిర్వహిస్తూ వస్తోంది కాశిష్‌. ‘నేను పనిచేసే చోట మగవాళ్లే ఎక్కువగా ఉంటారు. వాళ్లకి చెప్పి ట్రాక్‌లో ఉండే ఇబ్బందులని సరిచేయాలి. మొదట్లో నా అజమాయిషీ వాళ్లకు నచ్చేది కాదు. ఇక నా స్థాయి ఉద్యోగులు అయితే ‘నువ్వీ పనులు చేయలేవు.. నీకెందుకీ కష్టం. హాయిగా ఏసీలో కూర్చోక’ అంటూ నిరుత్సాహ పరచాలని చూశారు. దాంతో నాలో మరింత పట్టుదల పెరిగింది. ఎవరైనా ఇది నువ్వు చేయలేవు అంటే చాలు... ఆ పని పూర్తిచేసేవరకు నిద్రపట్టేది కాదు. అలా నన్ను భయపెట్టాలని చూసిన వాళ్లంతా విఫలమయ్యారు. ప్రస్తుతం రాజస్థాన్‌లోని 98.5 కిలోమీటర్ల పరిధిలో ఉండే తొమ్మిది సైట్లను పర్యవేక్షిస్తున్నా’ అని చెబుతోంది కాశిష్‌. మొదట్లో ఓ అమ్మాయి ఈ పనులు చేయలేదు అని చిన్నచూపు చూసిన వాళ్లే ఇప్పుడు ఆమెను శెభాష్‌ అంటూ మెచ్చుకుంటున్నారు.

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

మరిన్ని

రుచులు

App