మాటలు కలిపి మాయ చేసి

తాజావార్తలు


మాటలు కలిపి మాయ చేసి
ఏటీఎం కేంద్రాలు..డెబిట్‌ కార్డులే లక్ష్యంగా నేరాలు
స్వీయ జాగ్రత్తలతోనే సొమ్ము భద్రం
 హైదరాబాద్‌: ‘‘సార్‌... నా పేరు మల్లేష్‌... ఈ రోజు ఉదయం ముంబయి నుంచి బ్యాంకు అధికారుల పేరుతో నాకు ఫోన్‌ వచ్చింది. నా కార్డు సరిగాలేదని చెప్పారు. మంచి కార్డు ఇస్తామని చెప్పడంతో వారు అడిగిన వివరాలన్నీ చెప్పాను. కార్డు, పిన్‌ నంబర్లు, నా ఫోన్‌కు వచ్చిన సందేశం కూడా తెలియజేశాను. ఆ వెంటనే పదినిమిషాలకు మీరు రూ.72వేలు వాడుకున్నారంటూ చరవాణికి సందేశం వచ్చింది. నేను ఒక్క రూపాయి కూడా డబ్బు తీసుకోలేదు. మా బ్యాంకుకు వెళ్లి అడిగితే... మాకేం సంబంధం లేదు.. సైబర్‌క్రైమ్‌లో ఫిర్యాదు చేయండని తెలిపారు. ఇద్దరు పిల్లలకు జూన్‌లో పాఠశాల ఫీజు కట్టాలని నగదు దాచుకుంటే ఇలా జరిగింది. డబ్బులు పోయినప్పటి నుంచి నా భార్య భోజనం చేయడం లేదు. నాకు న్యాయం చేయండి’’

‘‘మా అమ్మాయికి డబ్బు అవసరమంటే సైఫాబాద్‌లోని ఏటీఎంకు వెళ్లాను. నేను ప్రయత్నిస్తుండగా ఓ యువకుడు వచ్చి సర్‌! నాకు కొంచెం అర్జెంట్‌... డబ్బులు తీసుకుంటానని చెప్పాడు. అతని కార్డు యంత్రంలో ఉంచి నంబరు కొట్టగా డబ్బు రాలేదు.. దీంతో నా కార్డును ఒకసారి ఇమ్మనగానే ఇచ్చాను. యంత్రంలో ఉంచగా.. ‘మళ్లీ డబ్బు రాలేదు. మీరు తీసుకోండంటూ’ పక్కనే ఉన్నాడు. నేను డబ్బు తీసుకున్న అనంతరం యంత్రంలోంచి కార్డు తీసి ఇచ్చాడు. ఇంటికి వెళ్లేలోపు రూ.36వేల నగదు తీసుకున్నట్టు నా చరవాణికి సందేశం వచ్చింది. నేను అంత తీసుకోలేదు. కార్డు పరిశీలిస్తే నాది కాకుండా నకిలీది. కనిపించింది. ఆ మోసకారి వల్ల పింఛను డబ్బు పోగొట్టుకున్నాను. అరెస్ట్‌చేసి డబ్బు వచ్చేలా చర్యలు తీసుకోండి’’

ఏటీఎం కార్డుల ద్వారా డబ్బులు స్వాహా చేస్తున్నారంటూ పదుల సంఖ్యలో సైబర్‌క్రైమ్‌ విభాగానికి ఫిర్యాదులు వస్తున్నాయి. మోసాలకు పాల్పడుతున్న నేరగాళ్లు, దొంగలు రోజుకో కొత్తశైలిలో బాధితులకు మస్కా కొడుతున్నారు. ఏటీఎం కేంద్రాలు, డెబిట్‌కార్డులే లక్ష్యంగా వీరు రెచ్చిపోతున్నారు. నగరంలో వరుసగా సైబర్‌ నేరాలు జరుగుతున్న నేపథ్యంలో ఉన్నతాధికారులు వారిని పట్టుకునేందుకు దిల్లీ, నోయిడా, ఝార్ఖండ్‌లకు ప్రత్యేకబృందాలను పంపించారు. మోసాలపై జాగ్రత్తగా ఉండాలంటూ ప్రచారం నిర్వహించాలని బ్యాంకుల యాజమాన్యాలకు లేఖలు రాశారు. ఫిర్యాదు చేసేందుకు వచ్చిన వారిని ఓదార్చుతూనే ఇకపై స్వీయజాగ్రత్తలు పాటించండంటూ చెబుతున్నారు.

చూపుతో పసిగట్టేస్తారు
ఏటీఎం కేంద్రాల్లో నగదు విత్‌డ్రా చేసుకునేవారిని అంతరాష్ట్ర నేరగాళ్లు, దొంగలు లక్ష్యంగా చేసుకుంటున్నారు. నగరంలో రద్దీతక్కువగా ఉన్న ప్రాంతాల్లో ఏటీఎం కేంద్రాల వద్ద యువ దొంగలు కాపు కాస్తున్నారు. కంటిచూపుతో మన కార్డు వివరాలను కనిపెట్టడం, నగదు వచ్చే యంత్రానికి ప్రత్యేక పరికరం అమర్చడం చేస్తున్నారు. దొంగల్లో 80శాతం మంది నగదు విత్‌డ్రా చేసుకునేందుకు వచ్చేవారిని గుర్తించి ‘నేను సాయం చేస్తానంటూ’ చెప్పి రూ.వేలు, లక్షలు స్వాహా చేస్తున్నారు. మిగిలిన 20శాతం మంది అత్యాధునిక పరికరాలతో లాగేస్తున్నారు. అలాగే సాయం చేస్తున్నట్లు నటించి మన కార్డు తీసుకునే దొంగలు తిరిగి ఇచ్చేటపుడు వేరే కార్డు ఇస్తున్నారు. ఇది బాధితులు గమనించేలోపే వారు అదృశ్యమవుతున్నారు. కార్డు నంబరు, పిన్‌నంబరు గుర్తులేక చాలామంది రూ.వేలు నష్టపోతున్నారు.

ఎవరూ అడగరు
ప్రతి ఒక్కరు కొన్ని స్వీయజాగ్రత్తలు తీసుకోవడం ముఖ్యమని సైబర్‌క్రైమ్‌ ఏసీపీ రఘువీర్‌ తెలిపారు. డెబిట్‌కార్డుల మోసాలను ఎప్పటికప్పుడు అరికట్టేందుకు ప్రత్యేక బృందాన్ని ఏర్పాటు చేశామన్నారు.

ఏటీఎం కార్డు నంబరును ఫోన్‌లో బ్యాంకు అధికారులు ఎప్పుడూ అడగరు. మీ వివరాలు అప్‌డేట్‌ చేస్తామని ఎవరైనా చెప్పినా నమ్మకూడదు.
కార్డులో మొదటి 8 నంబర్లను మోసగాళ్లు చాలా తేలికగా చెప్పేస్తారు. అరె! బ్యాంకు అధికారులు చేశారే అని అనుకోకూడదు. వారి వద్ద ఆ 8 నంబర్లు మాత్రమే ఉంటాయి.

సైబర్‌నేరగాళ్ల వద్ద డెబిట్‌కార్డు వెనుకవైపు ఉండే సీవీవీ సంఖ్య ఉండదు. దీని కోసం వారు చాలా సేపు మనల్ని మాటల్లో పెడతారు. సీవీవీ నంబరు మనం చెప్పగానే చరవాణికి వచ్చే సంక్షిప్త సందేశంలో అంకెను చెప్పమంటారు. ఇలాంటివేవీ వారికి చెప్పకూడదు. పైగా బ్యాంకు అధికారులు కూడా ఖాతాదారులను ఇవి అడగరు.

పాతకార్డుల స్థానంలో కొత్త కార్డులు పంపుతామని, రెండురోజుల్లో బ్యాంకుల నుంచి తీసుకోవచ్చంటూ ఇంకొందరు దొంగలు ఫోన్‌ చేస్తుంటారు. డెబిట్‌కార్డు వివరాలు మిమ్మల్ని అడగ్గానే తక్షణం ఫోన్‌ పెట్టేయండి.

నగదు కోసం ఏటీఎంలకు వెళ్లినప్పుడు పక్కన ఎవరైనా ఉంటే... కొంచెం దూరంగా వెళ్లండని చెప్పండి. మిమ్మల్ని గమనిస్తున్నారన్న అనుమానం రాగానే నగదు విత్‌డ్రా చేయకండి.

నగదు తీసుకునేప్పుడు ఏటీఎం యంత్రం వద్ద అంకెలపై నొక్కే క్రమంలో ఏదైనా తేడాగా కనిపిస్తే(అంకె నొక్కినపుడు కీ బోర్డు జారినట్టు అనిపిస్తే) వెంటనే వేరే కేంద్రానికి వెళ్లండి. నేరస్తులు కనీ కనిపించని పేపరు ఉంచే అవకాశాలున్నాయి.

నిమిషాల వ్యవధిలో...
బ్యాంకు అధికారులు, కార్డుదారులకు మాత్రమే తెలిసిన డెబిట్‌ కార్డు నంబర్లను దొంగలు సేకరిస్తున్నారు.తద్వారా వినియోగదారుడి చరవాణి నంబరు తెలుసుకుని ఖాతాల్లో ఉన్న డబ్బును నిమిషాల వ్యవధిలో మొబైల్‌ యాప్‌ ద్వారా బదిలీ చేసుకుంటున్నారు. బిహార్‌, ఝార్ఖండ్‌ నుంచి నేరగాళ్లు ఈ మోసాలు చేస్తున్నారని పోలీసులు గుర్తించారు. దిల్లీ, నోయిడాల్లోనూ ఇలాంటివి పెరుగుతున్నాయని, రహస్య సమాచారం బయటకు వెళ్లకుండా చూసుకోవాలని బ్యాంకుల అధికారులకు పోలీసులు సూచించారు. జాతీయ, బహుళజాతి, ప్రైవేటు బ్యాంకులు డెబిట్‌, క్రెడిట్‌ కార్డుల జారీని పొరుగుసేవలకు అప్పగించాయి. వినియోగదారుల వివరాలను ఆయా సంస్థకు ఇచ్చి వారి ద్వారా కార్డులను పంపుతున్నాయి. అయితే పొరుగుసేవల విభాగంలోని కిందిస్థాయి సిబ్బందిని ప్రలోభపెట్టి వేర్వేరు రాష్ట్రాలకు చెందిన బ్యాంకు ఖాతాదారుల కార్డుల వివరాలను తీసుకునే మోసగాళ్లూ ఉన్నారు. రోజుకు కనీసం వందమందిని మోసం చేస్తున్నారు.

దొంగలు ఏటీఎంలో నగదు తీసుకునేందుకు వస్తున్న వారి కార్డు నంబరు, కార్డులో వివరాలు... సీవీవీ నంబరును వేగంగా గుర్తించుకుని కాగితాలపై రాసుకుంటున్నారు. అనంతరం అంతర్జాల కేంద్రాలకు వెళ్లి ఆ వివరాలను నమోదు చేసి ఖరీదైన వస్తువులను సొంతచిరునామాకు తీసుకుంటున్నారు. ఇప్పటివరకు నగరంలో ఇద్దరు, ఏపీకి చెందిన నలుగురు నేరగాళ్లను మాత్రమే పోలీసులు అరెస్ట్‌ చేశారు. ముంబయికి చెందిన అంతరాష్ట్ర ముఠా కొద్దినెలల క్రితం ఏటీఎం కేంద్రాల్లో స్కిమ్మర్ల వంటి పరికరాలను ఉంచి రాత్రివేళల్లో ఎవరూ లేని సమయంలో ఆయా కార్డుల పిన్‌నంబర్ల ద్వారా నగదు స్వాహా చేసేవారు. పంజాగుట్ట పోలీసులకు అనుమానం వచ్చి ఒకరికి అరెస్ట్‌చేయగా... వందల సంఖ్యలో కార్డుల నుంచి ఇలా చౌర్యం జరిగినట్లు తేలింది.

FileName

  • FileName
మరిన్ని
FileName
FileName

  • FileName
మరిన్ని
FileName

  • FileName
మరిన్ని

  • FileName
మరిన్ని

  • FileName
మరిన్ని

  • FileName
మరిన్ని

  • FileName
మరిన్ని
జిల్లా వార్తలు

దేవ‌తార్చ‌న

రుచులు

© 1999- 2016 Ushodaya Enterprises Pvt.Ltd,All rights reserved.
Designed & Developed by Eenadu WebHouse
For Digital Marketing enquiries Contact : 9000180611, 040 - 23318181 eMail :marketing @eenadu.net
Best Viewed In Latest Browsers

Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.