close

ప్రధానాంశాలు

Facebook Share Twitter Share WhatsApp Share Telegram Share
వైకాపా ప్రభుత్వ అరాచకాలకు అడ్డుకట్ట

భాజపాతో కలిసి తిరుపతి ఉప ఎన్నికలో పోటీ
జనసేన రాజకీయ వ్యవహారాల కమిటీ తీర్మానం

ఈనాడు డిజిటల్‌, తిరుపతి: ప్రజా సమస్యలపై పోరాడేవారిని వైకాపా ప్రభుత్వం పోలీసులతో అణచివేస్తోందని జనసేన ఆందోళన వ్యక్తం చేసింది. రాష్ట్రంలో 144 సెక్షన్‌, పోలీసు చట్టం 30 అమలు కాని రోజు లేకుండా పోయిందని విమర్శించింది. ప్రభుత్వ అరాచకాలను అడ్డుకోవడమే లక్ష్యంగా ప్రజల్లోకి వెళ్లాలని ఆ పార్టీ రాజకీయ వ్యవహారాల కమిటీ (పీఏసీ) తీర్మానించింది. గురువారం తిరుపతిలో జనసేన అధ్యక్షుడు పవన్‌ కల్యాణ్‌, పీఏసీ ఛైర్మన్‌ నాదెండ్ల మనోహర్‌ ఆధ్వర్యంలో నిర్వహించిన సమావేశం దాదాపు 3 గంటలపాటు వివిధ అంశాలపై చర్చించింది. వివరాలను కమిటీ సభ్యులు కందుల దుర్గేష్‌, శ్రీనివాస యాదవ్‌, యశస్విని విలేకర్లకు వివరించారు. భాజపాతో    కలిసి తిరుపతి లోక్‌సభ స్థానం ఉప ఎన్నికలో పోటీ చేయాలని నిర్ణయించినట్లు తెలిపారు. పార్లమెంటు నియోజకవర్గ పరిధిలో కార్యకర్తల అభిప్రాయాలు తెలుసుకుని అభ్యర్థి ఎంపికపై మరోసారి భాజపాతో చర్చిస్తామన్నారు. అభ్యర్థి ఎంపిక, పొత్తు విషయంలో     భాజపాతో ఎలాంటి విభేదాలు లేవన్నారు. మార్చి వరకు ఎన్నికలు జరిగే అవకాశం లేనందున అభ్యర్థి ఎంపికపై తొందరపడనక్కర్లేదని అభిప్రాయపడ్డారు. పవన్‌కల్యాణ్‌ శుక్రవారం తిరుపతి నుంచి ఒంగోలు చేరుకుని శనివారం అక్కడ పర్యటిస్తారని, ఆత్మహత్య చేసుకున్న కార్యకర్త వెంగయ్యనాయుడు కుటుంబాన్ని పరామర్శిస్తారని తెలిపారు. ఎమ్మెల్యే రాంబాబు తీరును ఖండిస్తూ నిరసన చేపడతారన్నారు.
అసెంబ్లీని ముట్టడిస్తాం
భవన నిర్మాణ కార్మికులు, నివర్‌ తుపాన్‌ నష్టంపై సమావేశంలో చర్చించామని పీఏసీ సభ్యులు తెలిపారు. బాధితులకు ఎకరాకు రూ.35 వేలు నష్ట పరిహారం ఇవ్వాలని కోరినా ప్రభుత్వం పట్టించుకోలేదన్నారు. దీనికి నిరసనగా సమావేశాలు జరిగే సమయంలో అసెంబ్లీని ముట్టడించనున్నట్లు తెలిపారు. పార్టీ   క్రియాశీలక సభ్యత్వ నమోదుపై సమావేశంలో చర్చించినట్లు వివరించారు. ప్రస్తుత రాజకీయ పరిస్థితులు, తిరుపతి ఉపఎన్నికపై సభ్యులు తమ అభిప్రాయాలు చెప్పారని, ఈ రెండు అంశాలపై విస్తృతంగా చర్చించినట్లు చెప్పారు. మృతి చెందిన కార్యకర్త వెంగయ్యనాయుడుకు నివాళులర్పించారు.

ప్రధానాంశాలు

జిల్లా వార్తలు

దేవతార్చన


మరిన్ని
రుచులు