కృష్ణుడెందుకు నల్లగా..

వివేకచూడామణి

స్వామి వివేకానంద ఒకసారి మద్రాసు వచ్చారు. అక్కడి న్యాయ కళాశాలలో ఆయనకు బస ఏర్పాటయింది. వసతి గృహంలోని గదులన్నీ పరిశీలిస్తూ విద్యార్థులతో సంభాషిస్తున్నారు. అలా ఒక గదిలో గోడమీదున్న పటం చూస్తూ ‘అసలు శ్రీకృష్ణ పరమాత్ముడు నీలవర్ణంలో ఎందుకున్నాడో తెలుసా?’ అనడిగారు అక్కడున్న ఓ విద్యార్థిని.

వెంటనే ఆ విద్యార్థి ‘సముద్రం, ఆకాశం రెండూ అనంతమైనవి. రెండూ నీలి వర్ణంలోనే ఉంటాయి. శ్రీకృష్ణుడు, శ్రీరాముడు.. అనంతులు అని సూచించ డానికే వారి మేనిఛాయ నీలవర్ణంలో ఉంది స్వామీ’ అంటూ బదులిచ్చాడు.

ఆ మాటలు విన్న వివేకానంద చిరునవ్వు చిందించి, ‘నీలో చురుకుదనం ఉంది. జగద్విఖ్యాతి పొందుతావు’ అని దీవించారు.
స్వామి వివేకానందను మెప్పించిన ఆ కుర్రాడు మరెవరో కాదు.. అందరిచేతా ఆప్యాయంగా ‘రాజాజీ’ అని పిలిపించుకున్న చక్రవర్తుల రాజగోపాలాచారి.

ప్రతాప వెంకట సుబ్బారాయుడు