ఎయిమ్స్‌ భోపాల్‌లో నాన్‌ ఫ్యాకల్టీ కొలువులు

ఎయిమ్స్‌ భోపాల్‌ 233 గ్రూప్‌-సి నాన్‌ఫ్యాకల్టీ పోస్టుల భర్తీకి నోటిఫికేషన్‌ విడుదల చేసింది. కంప్యూటర్‌ ఆధారిత పరీక్ష, ధ్రువపత్రాల పరిశీలన ఆధారంగా అభ్యర్థులను ఎంపిక చేస్తారు. కంప్యూటర్‌ పరీక్ష పాసైన అభ్యర్థులకు పోస్టును బట్టి స్కిల్‌ టెస్ట్‌ కూడా నిర్వహిస్తారు.

మొత్తం 233 పోస్టుల్లో.. సోషల్‌ వర్కర్‌-2, ఆఫీస్‌/స్టోర్స్‌ అటెండెంట్‌ (మల్టీటాస్కింగ్‌)-40, లోయర్‌ డివిజన్‌ క్లర్క్‌-32, స్టెనోగ్రాఫర్‌-34, డ్రైవర్‌-16 (ఆర్డినరీ గ్రేడ్‌), జూనియర్‌ వార్డెన్‌-10 (హౌస్‌ కీపర్‌), డిసెక్షన్‌ హాల్‌ అటెండెంట్స్‌-8, అప్పర్‌ డివిజన్‌ క్లర్క్‌-2, డేటా ఎంట్రీ ఆపరేటర్‌ గ్రేడ్‌-ఎ-2, జూనియర్‌ స్కేల్‌ స్టెనో (హిందీ)-1, సెక్యూరిటీ కమ్‌ ఫైర్‌ జమదర్‌-1, స్టోర్‌ కీపర్‌ కమ్‌ క్లర్క్‌-85 ఉన్నాయి. వీటిల్లో అన్‌రిజర్వుడ్‌ అభ్యర్థులకు 105, ఓబీసీలకు 59, ఎస్సీలకు 33, ఎస్సీలకు 15, ఓబీసీలకు 21 కేటాయించారు.

ఏ అర్హతలు ఉండాలి?

సోషల్‌వర్కర్‌:  10+2 పాసై, 8 ఏళ్ల అనుభవం.. వయసు 18-35..

ఆఫీస్‌/స్టోర్స్‌ అటెండెంట్‌ (మల్టీటాస్కింగ్‌): పదోతరగతి, ఐటీఐ పాసవ్వాలి. వయసు 30 ఏళ్లకు మించకూడదు.

లోయర్‌ డివిజన్‌ క్లర్క్‌: ఇంటర్మీడియట్‌/తత్సమాన పరీక్ష పాసవ్వాలి. ఇంగ్లిష్‌లో నిమిషానికి 35 పదాలు/హిందీలో నిమిషానికి 30 పదాలు టైప్‌ చేయగలగాలి. కంప్యూటర్‌ నాలెడ్జ్‌ ఉన్నవారికి ప్రాధాన్యం. వయసు 18-30.

స్టెనోగ్రాఫర్‌: ఇంటర్మీడియట్‌/తత్సమాన పరీక్ష పాసవ్వాలి. స్కిల్‌ టెస్ట్‌, 10 నిమిషాల డిక్టేషన్‌ ఉంటుంది. ఈ మేటర్‌ను ఇంగ్లిష్‌లో 50 నిమిషాలు/ హిందీలో 65 నిమిషాల వ్యవధిలో కంప్యూటర్‌పై టైప్‌ చేయాలి. వయసు 18-27 సంవత్సరాల మధ్య ఉండాలి.

స్టోర్‌ కీపర్‌ కమ్‌ క్లర్క్‌: డిగ్రీ పాసై .. స్టోర్స్‌ నిర్వహణలో ఏడాది అనుభవం ఉండాలి. మెటీరియల్స్‌ మేనేజ్‌మెంట్‌లో పోస్ట్‌ గ్రాడ్యుయేట్‌ డిగ్రీ/ డిప్లొమా ఉన్నవారికి ప్రాధాన్యం ఉంటుంది. వయసు 30 మించకూడదు.

గరిష్ఠ వయసులో ఎస్సీ/ఎస్టీలకు ఐదేళ్లు, ఓబీసీ(ఎన్‌సీఎల్‌)కు మూడేళ్లు, పీడబ్ల్యూబీడీ అభ్యర్థులకు పదేళ్లు, కేంద్ర, రాష్ట్రప్రభుత్వ రెగ్యులర్‌ ఉద్యోగులకు ఐదేళ్ల మినహాయింపు ఉంటుంది. జనరల్‌, ఓబీసీ, ఈడబ్ల్యూఎస్‌ అభ్యర్థులకు దరఖాస్తు ఫీజు రూ.1200. ఎస్సీ, ఎస్టీ, పీడబ్ల్యూబీడీ అభ్యర్థులకు రూ.600.

గమనించాల్సినవి

• ఒకటికంటే ఎక్కువ పోస్టులకు దరఖాస్తు చేయొచ్చు. అయితే దరఖాస్తులో సమయంలోనే పోస్టుల ప్రాధాన్యాన్ని తెలియజేయాలి. ఆ తర్వాత దీంట్లో ఎలాంటి మార్పులు చేయడానికీ అవకాశం ఉండదు. ప్రతి పోస్టుకూ వేర్వేరుగా ఫీజు చెల్లించాలి.
• పరీక్ష కేంద్రాల వివరాలను అడ్మిట్‌ కార్డ్‌లో తెలియజేస్తారు. దీన్ని ఎయిమ్స్‌ భోపాల్‌ వెబ్‌సైట్‌ నుంచి డౌన్‌లోడ్‌ చేసుకోవాలి.

దరఖాస్తుకు చివరి తేదీ: 30.10.2023

వెబ్‌సైట్‌: ‌www.aiimsbhopal.cdu.in

ప్రశ్నపత్రంలో..  

కంప్యూటర్‌ ఆధారిత పరీక్ష, ధ్రువపత్రాల పరిశీలన ఆధారంగా అభ్యర్థుల ఎంపిక ఉంటుంది. కంప్యూటర్‌ పరీక్ష పాసైన అభ్యర్థులకు పోస్టును బట్టి అవసరమైతే.. స్కిల్‌ టెస్ట్‌ నిర్వహిస్తారు. సీబీటీలో కనీసార్హత మార్కులు 35 శాతం.

• ప్రశ్నపత్రం 100 మల్టిపుల్‌ ఛాయిస్‌ ప్రశ్నలతో 100 మార్కులకు ఉంటుంది. పరీక్ష వ్యవధి 90 నిమిషాలు. ప్రశ్నపత్రంలో ఆరు విభాగాలు ఉంటాయి.

1 జనరల్‌ నాలెడ్జ్‌ అండ్‌ అవేర్‌నెస్‌కు 25 మార్కులు. దీంట్లో.. ఇండియన్‌ జాగ్రఫీ, జనరల్‌ సైన్స్‌ (పదో తరగతి స్థాయి), భారత ప్రభుత్వం, ప్రభుత్వ విధానాలు, జాతీయ, అంతర్జాతీయ వర్తమానాంశాలు, కంప్యూటర్‌కు సంబంధించిన ప్రాథమికాంశాల నుంచి ప్రశ్నలు ఇస్తారు.

2 ఇంగ్లిష్‌ కాంప్రహెన్షన్‌కు 10 మార్కులు. ఈ విభాగంలోని ప్రశ్నలు అభ్యర్థి ఇంగ్లిష్‌ పరిజ్ఞానాన్ని పరీక్షించేలా.. పదోతరగతి స్థాయిలో ఉంటాయి. టెన్స్‌, వెర్బ్‌, ప్రిపొజిషన్‌, సిననిమ్స్‌, యాంటనిమ్స్‌, కరెక్టు స్పెల్లింగ్‌ను గుర్తించడం... లాంటి ప్రశ్నలు ఇస్తారు.

3 క్వాంటిటేటివ్‌ ఆప్టిట్యూడ్‌కు 20 మార్కులు. పదోతరగతి స్థాయిలో ఉంటుంది. యావరేజ్‌, పర్సంటేజ్‌, ప్రాఫిట్‌-లాస్‌, టైమ్‌-డిస్టెన్స్‌, టైమ్‌-వర్క్‌, కోడింగ్‌-డీకోడింగ్‌.. మొదలైన అంశాల నుంచి ప్రశ్నలు ఇస్తారు.

4 జనరల్‌ ఇంటెలిజెన్స్‌ అండ్‌ రీజనింగ్‌ ఎబిలిటీకి 25 మార్కులు. సిమిలారిటీస్‌-డిఫరెన్సెస్‌, సిరీస్‌ కంప్లీషన్‌, డైరెక్షన్‌, రిలేషన్‌షిప్స్‌, అరిథ్‌మెటికల్‌ రీజనింగ్‌, నాన్‌-వెర్బల్‌ సిరీస్‌.. మొదలైన అంశాల ప్రశ్నలు ఉంటాయి.

5 కంప్యూటర్‌ అప్లికేషన్స్‌కు సంబంధించిన ప్రాథమికాంశాలు 10 మార్కులకు ఉంటాయి. ఉదాహరణకు ఎంఎస్‌-ఆఫీస్‌, ఇంటర్నెట్‌.. మొదలైన వాటి నుంచి ప్రశ్నలు ఇస్తారు.

6 సీసీఎస్‌ (కండక్ట్‌) రూల్స్‌ 1964, సీసీఎస్‌ (లీవ్‌) రూల్స్‌ 1972 పరిజ్ఞానాన్ని పరీక్షించే ప్రశ్నలు ఉంటాయి. వీటికి 10 మార్కులు.  

• ప్రతి తప్పు సమాధానానికీ 0.25 మార్కు తగ్గిస్తారు.

సన్నద్ధత

• బ్యాంక్‌, ఆర్‌ఆర్‌బీ.. ఇతర పోటీ పరీక్షల పాత పేపర్లను సాధన చేయడం ద్వారా కంప్యూటర్‌ ఆధారిత పరీక్షలో మంచి మార్కులు సంపాదించే అవకాశం ఉంటుంది.
• ఆన్‌లైన్‌ మాక్‌ టెస్టులను రాయడం వల్ల కూడా ఫలితం ఉంటుంది. ఇవి మీ సన్నద్ధతకు దిశానిర్దేశం చేస్తాయి.
• పేపర్‌ మోడల్‌ విషయంలో అవగాహన వస్తుంది. కాబట్టి గందరగోళం లేకుండా సన్నద్ధతను కొనసాగించొచ్చు.
• నిర్ణీత వ్యవధి లోపల ఎన్ని ప్రశ్నలకు సమాధానాలు రాయగలుగుతున్నారో తెలుస్తుంది. ఏయే అంశాల్లో మెరుగ్గా ఉన్నారో, ఎక్కడ బలహీనంగా ఉన్నారో అర్థమవుతుంది.
• సన్నద్ధత స్థాయిని ఎప్పటికప్పుడు సమీక్షించుకుని, మెరుగుపరుచుకునే అవకాశం ఉంటుంది.