డిప్లొమాతో ఎంబీఏ?

మెకానికల్‌ ఇంజినీరింగ్‌ డిప్లొమా చేసి పదేళ్లకు పైగా పనిచేస్తున్నాను. ఇప్పుడు ఐఐఎంలో ఎంబీఏ చేయాలనుకుంటున్నాను. ఇది సరైన నిర్ణయమేనా?

- ఎస్‌. రవిశంకర్‌

పది సంవత్సరాలు ఉద్యోగం చేసిన తరువాత ఎంబీఏ కోర్సు చేయాలన్న మీ నిర్ణయం సరైందే. ఎంబీఏ చదవడానికి ఉద్యోగానుభవం అదనపు అర్హత అవుతుంది. కానీ మీరు మెకానికల్‌ ఇంజినీరింగ్‌లో డిప్లొమా చేశాక డిగ్రీ చేసినట్లుగా చెప్పలేదు. ఐఐఎంలో అయినా, మరే విద్యా సంస్థలో అయినా ఎంబీఏ లాంటి పీజీ కోర్సు చేయాలంటే కనీసం మూడు సంవత్సరాల వ్యవధితో డిగ్రీ పూర్తిచేయాలి. ముందుగా మీరు రెగ్యులర్‌/ ఓపెన్‌ యూనివర్సిటీ/ దూరవిద్య విధానంలో ఏదైనా డిగ్రీ చదవండి. మీకు బీటెక్‌ చేసే ఉద్దేశం ఉంటే, మూడు సంవత్సరాల బీటెక్‌ మెకానికల్‌ ఇంజినీరింగ్‌ కోర్సుని ఫుల్‌ టైమ్‌లో చేయండి. ఆ తరువాత క్యాట్‌ ప్రవేశపరీక్ష రాసి, అందులో మెరుగైన స్కోరు సాధించి, రిటెన్‌ ఎబిలిటీ టెస్ట్‌, పర్సనల్‌ ఇంటర్వ్యూల ద్వారా ఐఐఎంలో ప్రవేశం పొందండి.

- ప్రొ. బెల్లంకొండ రాజశేఖర్‌, కెరియర్‌ కౌన్సెలర్‌